Интернет тармактарында Кытайдын Ухань вирусология институтунун лабораториясынын коронавирус пандемиясы тараганга чейин алынган бир нече сейрек сүрөттөрү пайда болду. Буга чейин Британиянын, АКШнын чалгын кызматы дал ушул лабораториядан вирус тарап кетиши мүмкүндүгүн деген версияны айтышкан эле. Сүрөттөрдү «MSN» жарыялагандыгына таянып, чет элдик маалымат булактары жазып чыгышты.

Маалыматка караганда, бул сүрөттөр 2015-2017-жылдары тартылган.

Ухань вирусология институтунда 1,5 миңден ашык коркунучтуу вирустун түрлөрү сакталып турат. Лаборатория кооптуу козгогучтарды, айрыкча жарганаттар аркылуу жуккан вирусту изилдөөгө басым жасайт.

Декабрь айында чыккан жаңы вирус аталган институтта пайда болгон деген божомолдор айтылган. Бирок лабораториянын окумуштуулары адам биринчи жолу жапайы жаныбардан коронавирус жуктурганын маалымдашкан.

Кытай мындай теорияларды бир нече жолу четке каккан. Ушул жылдын февраль айында институттун директору Ши Ченгли маалымат жыйында вирус лабораторияга байланыштуу эмес деп баса белгилеп, "өз өмүрүм менен кепилдик берем" деп айткан. 

Көптөгөн эл аралык эксперттер да мындай теорияларды четке кагышкан.

300 миллион юанга (34 миллион фунт) бааланган бул долбоорду толугу менен бүтүрүү үчүн Кытай 15 жыл сарптаган.

Институттун негизин биологиялык коопсуздугу эң жогорку деңгээлдеги төрт кабаттуу лаборатория түзөт. Лабораториянын курулушу 2015-жылы аяктап, ар кандай коопсуздук текшерүүлөрүнөн өткөндөн кийин 2018-жылдын 5-январында расмий түрдө ачылган.

Булак: NazarNews.kg