Президенттин экс-кеңешчиси Арзыбек Бурканов филармониянын артына чоң имарат куруп жатат. Ал объект мурдагы президент Курманбек Бакиевдин тушунда курула баштаган, бирок кийин көп жылдар бою курулуш иштери токтоп калган.

Учурда имараттын курулуш иштери жанданды. Бирок бул жерди ким куруп жатканы, эмне болору жазылган плакаттар чыга элек.

«Бишкекглавархитектура» ишканасынын акыркы маалыматы боюнча 0,02 га жер тилкесин 2007-жылдын 5-апрелинде М.Н.Коновченко берилген.

Ал жер астындагы ажаткананы реконструкциялоо менен кеңсени долбоорлоо жана куруу үчүн 49 жылга убактылуу пайдаланууга берилген.

2007-жылдын 9-июнунда жерди пайдалануу укугу «Нью Сити Билд» ЖЧКсына сатылган. Ошол эле жылдын декабрь айында шаардык Кеңеш жумушчу тартиптеги сын-пикирлерди жоюуну жана Мамлекеттик курулуш комитети менен макулдашууну эске алуу менен долбоорду жактырган.

«Нью Сити Билд» ЖЧКсынын 2008-жылдын 31-январындагы билдирүүсүнө ылайык, «Бишкекглавархитектура» тарабынан бул долбоорго архитектуралык-пландоо тапшырмасы иштелип чыккан.

«Мамлекеттик курулуштун 2008-жылдын 5-ноябрында андан ары бекитүү жана экспертизадан өткөрүү сунушу тууралуу сын-пикирлердин жоктугу боюнча каты бар. Жумушчу долбоор «Архстройпроект» долбоорлоо фирмасы тарабынан иштелип чыгып, 2008-жылдын 10-ноябрында жактырылган», - деп билдирди БГА.

Юстиция министрлигинин маалыматы боюнча, «Нью Сити Билд» 2010-жылы кайра каттоодон өткөн. Уюштуруучусу «Ала-Тоо» компаниялар тобу» ЖЧКсы, ал эми директору Бурканов Алтынбек Орозматович.

Osoo.kg сайтынын маалыматы боюнча, уюштуруучулар жана жетекчилик бир эле адамдарды көрсөткөн, бирок компания кечээ, 2021-жылдын 14-декабрында кайра каттоодон өткөн.

«Ала-Тоо Групп» ЖЧКсынын негиздөөчүлөрү Бурканова Клара Оморбековна жана Бурканов Арзыбек Орозматович экени ачык булактардан белгилүү болду.

Арзыбек Бурканов 2005-2007-жылдары «Алга, Кыргызстан!» партиясынан Жогорку Кеңештин депутаты жана 2007-2010-жылдары Бакиевдин «Ак-Жол» партиясынан депутат болгон.

2010-жылдын 20-январында Кыргызстандын ошол кездеги премьер-министри Данияр Үсөнов аны Баткен облусунун губернаторунун милдетин аткаруучу кылып дайындап, 2012-жылдын 1-февралында премьер-министр Өмүрбек Бабановдун буйругу менен Бурканов бул кызматтан бошотулган.

2015-жылы Бурканов «Кыргызстан» саясий партиясынын теңтөрагасы болгон.

Азыркы өкмөттүн тушунда Арзыбек Бурканов президенттин же премьер-министрдин кеңешчиси болгон. Садыр Жапаров маалымат каражаттарына берген маегинде кадр маселесин Бурканов чечет деген маалыматка комментарий берип, анын атын атаган.

Жапаровдун айтымында, Бурканов бир дагы адамды бийликке алып келген эмес, анын көрсөтмөлөрүн гана аткарган. Президент муфтиятка байланыштуу кырдаалга комментарий берип жатып Буркановдун атын да атап, ал уламалардын кайрылуусун угуу үчүн кеңешчисин жөнөткөнүн айтты.

Кийинчерээк Улукбек Марипов Буркановду премьер-министрдин кеңешчиси кызматынан бошотканы белгилүү болгон.

Kaktus.media редакциясы Бурканов тууралуу бир нече жолу: курулуп жаткан имараттагы батирлерди сатып алуучулар аны аткарылбаган убадалар үчүн айыпташкан, ал дагы Ататүрк паркынан жер тилкесин алган чиновниктердин бири деп жазган.

Буркановдордун дагы бир үй-бүлөлүк ЖЧКсы «Ала-Тоо» компаниялар тобу «МИСК-Бишкек» ЖЧКсын түзүп, «Эл куту» монументинин айланасындагы жер тилкесин сатуу жаңжалына аралашкан. Кыргызстандын ошол кездеги президенти Алмазбек Атамбаев ал жерге салтанаттуу түрдө сакура отургузмакчы болгон, бирок ал жер сатылып кеткенин билип, бул маселени чечүүнү тапшырган.

Арзыбек Буркановдун аты-жөнү криминалдык авторитет Камчы Көлбаевдин ишинде да айтылып, ал жабырлануучу катары таанылып, бирок андан соң Көлбаевге материалдык да, моралдык да дооматы жок деп арыз жазган.

Булак: NazarNews.kg