Сузакта таксистке алты жолу бычак сайып, унаасын уурдап кеткен шектүүлөр кармалды. Бул тууралуу Жалал-Абад облустук ички иштер башкармалыгынын басма сөз кызматы билдирди.

Милициянын маалыматына ылайык, 24-июль күнү окуя тууралуу маалымат түшкөн.

Маалымат боюнча Сузак РИИБдин ыкчам Тергөө тобу Сузак райондук ооруканасына барган учурда, 1998-жылы туулган М. уулу Ж. аттуу жаран денесинен 6 жеринен кесилип сайылган жаракаттары менен келип түшкөндүгү аныкталган.

Бул факты 25-июлда Сузак РИИБдин Тергөө кызматы тарабынан, кылмыштардын бирдиктүү реестрине Кылмыш-жаза кодексинин 207-беренеси (каракчылык) менен катталып, кылмыш иши козголгон.

Козголгон кылмыш ишинин алкагыныда шектүү катары Өзбекстандын 1985-жылы туулган А.У. жана 1992-жылы туулган С.З. аттуу жарандары Кызыл-Кыя шаарынан коңшу өлкөгө мыйзамсыз чек араны бузуп качып кирүүгө аракет жасап жаткан жеринен кармалышкан.

Тергөө амалдарынын жүрүшүндө коңшу мамлекеттин 1992-жылы туулган С.З. аттуу тугуну мурда соттолуп, учурда издөөдө жүргөндүгү, ал эми Кыргыз Республикасынын аймагына мыйзамсыз чек араны бузуп киргендиги аныкталган.

Шектүүлөр 25-июль күнү Сузак райондук соту тарабынан эки айга камакка алынган.