Тайвань Америка Кошмо Штаттары менен коопсуздук мамилелерин мындан ары тереңдетүүгө умтулат, деп билдирди өлкөнүн Тышкы иштер министрлиги АКШ менен Кытайдын лидерлеринин ортосундагы жакында болгон сүйлөшүүгө комментарий берип.

Бүгүн, 29-июлда Тайвандын Тышкы иштер министрлиги Кытайдын төрагасы Си Цзиньпин менен АКШнын президенти Джо Байдендин Тайван маселесин көтөргөн телефон сүйлөшүүсүнө байланыштуу расмий сайтында билдирүү таратты.

"Биз Тайвань менен Америка Кошмо Штаттарынын ортосундагы тыгыз коопсуздук өнөктөштүгүн тереңдетүүнү, эрежелерге негизделген эл аралык тартипти биргелешип коргоону жана Тайвань кысыгындагы коопсуздукту, ошондой эле Индо-Тынч океан аймагында тынчтыкты, туруктуулукту жана гүлдөп-өнүгүүнү камсыз кылууну улантабыз", - деп айтылат билдирүүдө.

Белгилүү болгондой, америкалык тарап сүйлөшүү аяктагандан кийин дароо Тайванга маалымат берген. Тактап айтканда, АКШ Тайвань администрациясына Байден Си Цзиньпинге АКШнын Тайвань боюнча саясаты өзгөрүүсүз экенин жана АКШ статус-квону бир тараптуу өзгөрткөн же Тайван кысыгындагы тынчтык менен стабилдүүлүккө доо кетирген бардык аракеттерге катуу каршы экенин баса белгилегенин айтты.

Америка Кошмо Штаттары менен Кытайдын лидерлеринин телефондук сүйлөшүүсү бейшемби күнү Өкүлдөр палатасынын спикери Нэнси Пелосинин Тайванга ыктымал сапары тууралуу кабарлардын тушунда болду. Бул пландар Пекиндин кескин терс реакциясын жаратты, Ак үй Пелосинин пландары боюнча ачык комментарий бербейт, бул анын сапары тууралуу чечим кабыл алуу укугун калтырат.

Байден менен сүйлөшүү учурунда Си Цзиньпин Тайвандын иштерине кийлигишүүгө жол берилбестигин белгилеп, саны 1 миллиард 400 миллиондон ашкан кытай элинин Кытайдын мамлекеттик эгемендүүлүгүн жана аймактык бүтүндүгүн коргоо боюнча эрки “чексиз” экенин кошумчалады.

Булак: NazarNews.kg