Бүгүн, 24-ноябрдагы Жогорку Кеңештин Экономикалык жана фискалдык саясат боюнча комитетинин кезектеги жыйынында 2019-жылга карата Кыргыз Республикасынын республикалык бюджетинин аткарылышы талкууга алынды. Муну менен катар Кыргыз Республикасынын 2020-жылга республикалык бюджети жана 2021-2023-жылдарга карата болжолу да талкууланууда.

Жыйында Премьер-министрдин милдетин аткаруучу, вице-премьер-министр Артем Новиков өлкөдөгү экономикалык өзгөрүүлөр дүйнөдөгү жана Кыргызстандагы кырдаалга жараша болгонун белгилеп, бирок ага карабай бардык каржылык милдеттемелер аткарылып жатканын билдирди.

Берилген маалыматка ылайык, 2020-жылы ИДПнын көлөмү 5.3% төмөндөшү күтүлүүдө.  Өнөр-жай жана тейлөө тармагында 9,1% деп бекитилген өсүшкө жетпей, 4,8%га төмөндөшү  көрүнүүдө. Ал эми курулуш жана айыл-чарбасында да өсүү темпи 2,9%дан 2%га төмөндөшү мүмкүн. 

Ошондой эле жыйында Премьер-министрдин милдетин аткаруучу, вице-премьер-министр Артем Новиков коронавирус илдетине каршы жүргүзүлүп жаткан иштерге токтолуп, учурда эки айга жеткидей керектүү жабдуулар, дары-дармек каражаттары камсыздалганын кошумчалады.

Талкуу маалында депутат Дастан Бекешев 2021-жылы бюджеттеги таңсыктыкты азайтуу багытындагы Өкмөттүн аракетин сурады.

Өз кезегинде Премьер-министрдин милдетин аткаруучу, вице-премьер-министр Артем Новиков салыктык жараяндардын фискалдаштыруу менен санариптештирүү аркылуу салыктык түшүүлөрдү көбөйтүү жаатында иштер жүргүзүлөрүн билдирди. "Өнөктөштөр менен сүйлөшүп, эл аралык инвестициялык алакаларды арттыруу багытында сүйлөшүүлөрдү улантып жатабыз", - деди Артем Новиков.  

Эскерте кетсек, жыйынга тиешелүү министрликтердин жана мекемелердин жетекчилери катышууда. 

Булак: NazarNews.kg