Жарымы сабатсыз, жарымы бизнесмен, бир тобу айыл өкмөттөрүнөн турган Жогорку Кеңеш чыр дөбөгө айланып, депутат Адахан Мадумаров менен УКМК төрагасы Камчыбек Ташиевдин ортосундагы полемикадан кийин эл экиге бөлүнүп, эки тарап болуп соцжеледе акыйнек айтыша баштады.

Өзүнүн ыйгарым укуктарын, эмне кыларын да жакшы билбеген депутаттар жакын да Араванга барып, айыл өкмөттөрүнүн ишине кийлигишебиз (1) деп элден кагуу жеп кайра келишти. Эми болсо чыр дөбөгө айланып, ызы-чуу болуп, мыйзам чыгаруу иши четте калып, ар кандай кутумчулук иштердин ордосуна айланып баратат окшойт. Ачыбаган камырдай болгон спикер Талант Мамытов жыйынды жөндөп башкара албай оозун ачып отурат. Бул тууралуу макала Азия Ньюс гезитинин 9-июнда чыккан санында жарык көрдү.

Эске салсак, 2-июнда Жогорку Кеңештин жалпы жыйынында Улуттук коопсуздук боюнча мамлекеттик комитеттин төрагасы Камчыбек Ташиев аткезчилик боюнча маалымат берүүнүн алдында депутат Адахан Мадумаровду «УКМКга далилсиз сын айтууда» деп айыптаган. 

Депутат Мадумаров отурган ордунан «далил менен сүйлө» деп кыйкырып, парламенттин жыйынында Ташиев менен кайым айтышып, чырдаша кеткен. Мадумаров менен Ташиев кайым айтышып, аларды спикер Талант Мамытов сабырдуулукка чакырган. 

Кыргызстан Тажикстан менен чек арасын өткөн жылдын апрель айындагы куралдуу жаңжалдан кийин бир тараптуу жапкан. Ошондон кийин аткезчилик токтобой жатканы айтылып, жергиликтүүлөр ага каршы күрөшүү талабын көтөрүшкөн эле. 

Өз кезегинде, президент Садыр Жапаров 2-июндагы парламент жыйынындагы УКМКнын төрагасы Камчыбек Ташиев менен депутат Адахан Мадумаровдун кайым айтышы боюнча пикирин айтып, Мадумаровду «мамлекетчил эмес» деп айткан.

Президенттин сынына: «Бул экөөнө (ред: Камчыбек Ташиев, Садыр Жапаров) менде комментарий жок. Алар «популист» деген сөздү дагы түшүнбөйт. Мени Акаев, Бакиев, Атамбаев, Отунбаева, Жээнбеков дагы сындаган. Алар кайда, мен кайда?», - деп жооп берген.

Булак: NazarNews.kg