«Ислам мамлекети» экстремисттик тобунун мурдагы согушкери Парвиз Косимов Тажикстандын аймактарына барып, жаштардын арасында түшүндүрүү иштерин жүргүзүүдө.

Жолугушууларда ал Сириядагы үрөй учурган көрүнүштөр, ошондой эле согушка алданып барып, кийин өкүнүп калган Тажикстандын жана башка өлкөлөрдүн жарандары тууралуу айтып берүүдө.

Парвиз Косимов Бохтар районунун эли менен болгон жолугушуусунда кантип «Ислам мамлекетинин» катарына кошулганы жөнүндө айтып берди:

— 2014-жылы сентябрда «Одноклассники» социалдык түйүнү аркылуу азгырылып, «Ислам мамлекети» тобунун катарына кошулуу үчүн Сирияга баргам. Анда өтө ырайымсыз жана катаал көрүнүштөргө күбө болуп, эмне болсо да мекениме кайтам деп чечкем.

Бохтар районунун жашоочусу Парвиз Косимов Сирияда 9 ай жүргөндөн кийин качып кеткен. 2015-жылы Тажикстанга кайтып келип, өз каалоосу менен бийликтин колуна түшүп берген. Анын Тажик улуттук университетиндеги окуусун улантуу өтүнүчү канааттандырылган эмес, учурда ал укук коргоо органдарынын тыкыр көзөмөлүндө.

Расмий маалыматтар боюнча учурда Тажикстандын 1100гө жакын жараны Сирия менен Ирактагы согуштарга катышууда. Бийлик 2016-жылы экстремисттик жана террористтик топтордун катарына кошулган тажик жарандарынын саны азайганын белгилөөдө.

Булак:"centralasian.org"