Баткендеги кол салуудан, каза болгон аскерлердин банктагы жана салык кызматындагы карыздарын кечиш керек. Мындай пикирин бүгүн, 22-сентябрда NazarNews маалымат агенттигине Төлөгөн Келдибаев билдирди.

-Төлөгөн мырза, тажиктердин кол салуусунан жапа чеккен, каза болгон аскер кызматкерлерине кандай жеңилдиктер берилиши керек?

- Баткендеги кол салуудан жабыр тарткан, каза болгон аскерлердин банктагы жана салык кызматындагы карыздарын банк жана салык кызматы кечип, карыздарын өндүрүүдөн баш тартышы керек. Ошондой эле мамлекет тарабынан бекер үй, балдарына токтоосуз жөлөк пул жана башка коммуналдык төлөмдөрдөн толук бошотулушу зарыл. Балдары бала бакча, мектепке кезексиз алынышы шарт. Ал эми өздөрүн менчик клиникалар, медициналык лабораториялар бекер тейлеши керек. Жергиликтүү бийлик мына ушундай шарттарды түзүп, социалдык  жактан камсыз кылышы керек.

Эске салсак, 14-сентябрь күнү тажик аскерлери Баткенде чек арага жакын аймактарга ок чыгарып, сүйлөшүүдөн кийин токтогон болчу. Бирок 16-сентябрдын таңында Баткен облусунун бардык чек ара тилкесин аткылап кирген. Кагылышууга тажик аскерлери эле эмес, жалданма топтор дагы аралашкан.

Кыргызстандын Чек ара кызматы күч түзүмдөрү тажик тарап КР аймагын басып алуу максатында оор техникаларды, авиация, "Град" ракеталык системасын колдонуп жатканын кабарлады.

17-сентябрда Оштун Чоң-Алай районундагы заставаларды аткылай баштаган.

Тажикстандын аскерлери, жөнөкөй жарандары жана белгисиз топтор Баткен менен Лейлек райондорундагы ондогон үйлөрдү, социалдык объектилерди, дүкөндөрдү талап-тоноп, өрттөп кетишкен.

18-сентябрда атышуу токтоду, бирок абал толук турукташа элек.

Тажик тараптын кол салуусунан 59 кыргызстандык набыт болду, арасында жай тургундар, жаш балдар бар. 169 киши ар кандай жаракат алган, оор абалдагылар Ош жана Бишкектеги ооруканаларга жеткирилип жатат.

Кыргызстан расмий түрдө бул окуяны "Тажикстандын алдын ала даярдалган агрессиялык куралдуу кол салуусу" деп атады. Садыр Жапаров дагы БУУнун сессиясында бүт дүйнөгө тажик тарап Кыргызстанга чыккынчылык менен кол салганын белгиледи.

Булак: NazarNews.kg