Токмокто 3 жаштагы кызды уурдоого шектелген адам кармалды

Журналист: АЙСУЛУУ ТАЛАНТ

01.03.2025, 14:15

49837

кылмыш жана кырсык

Токмок шаарында 3 жаштагы кызды уурдоого шектелген адам кармалды. Бул тууралуу Чүй ОИИБдин басма сөз кызматы билдирди.

Маалыматка караганда, милицияга 28-февралда 22 жаштагы аял киши кайрылып, 1985-жылы туулган А.Р. аттуу жаран анын кызын уурдап, Токмоктун батыш тарабына качып кеткенин билдирген.

Бул факт Кылмыштардын жана жоруктардын бирдиктүү реестрине катталып, Кылмыш-жаза кодексинин 165-беренеси (адам уурдоо) боюнча кылмыш иши козголгон. ШИИБ жана прокуратуранын жетекчилиги астында ыкчам штаб түзүлүп, «Кармоо» планы жарыяланган.

Ыкчам издөө иш-чараларынын жүрүшүндө кыздын жана шектүүнүн жери аныкталган, алар шаардын четинде болушкан. Бүгүн, 1-мартта шектүү кармалып, убактылуу кармоо жайга киргизилди.

Тергөө учурунда аталган жарандар 2024-жылдын февраль айынан октябрь айына чейин жарандык никеде жашап келгени аныкталган. Аялдын биринчи никесинен 2021-жылы туулган Ж.А. аттуу кызы болгон.

Октябрь айында ал Россияга иштегени кетип, 25-февралда кайтып келген. 28-февралда алар Токмоктон Бишкекке чогуу келе жатышканда жолдо кызганычтын айынан чыр чыккан. А.Р. унааны токтотуп, аялды түшүрүп, анын кызы Ж.А.ны унаага салып, из жашырган.

Бул факт боюнча тиешелүү соттук-укуктук экспертизалар дайындалды, тергөө уланууда.