Улуттук коопсуздук боюнча мамлекеттик комитеттин мурдагы жетекчиси Камчыбек Ташиевдин уулу Тай-Мурас Ташиев салык кызматы тарабынан "Кыргызнефтегаз" компаниясынын айланасындагы кырдаал боюнча таратылган маалымат боюнча комментарий берди.

Анын айтымында, ачык маалыматтарда көрсөтүлгөндөй, “Кыргыз Петролеум Компани” (“Кыргызнефтегаз”) 2021-жылдан 2025-жылдар аралыгында жалпы 357.9 миң тонна дизтопливо өндүргөн.

"Менин “Мока Групп” компаниям 2021-жылдан 2025-жылдар аралыгында бул ишканадан жалпы 5 463 тоннага жакын гана дизтопливо сатып алган. Бул көлөм “Кыргыз Петролеум Компани” өндүргөн дизтопливанын 1,53 % гана түзөт. Бул сатып алууларда тийиштүү салыктар мамлекетке төлөнгөн.

Демек, бул жерде бизге карата айтылган: ““Кыргыз Петролеум Компаниге” монополия кылып алган, бүт дизтопливасын “Мока Групп” сатып алган, башкалар сатып ала албай калган…”жана башка таратылган маалыматтар толугу менен калп. Бизден башка фирмалар дагы өздөрүнө керектүү көлөмдө сатып алып келишкен.

Мага жеткен маалыматтарга ылайык, учурда “Кыргыз Петролеум Компани” дизтопливо өндүрүшүн жакынкы күндөрү токтотуу алдында турат. Анткени, алардын кампалары толуп, дизтопливону сатып алуу кескин азайганы айтылып жатат. Анын тийиштүү адистери жеке фирмаларга байланышып, дизтопливо сатып алуусун сунуштап, кардар издеп жатышканы дагы белгилүү болду.

Тийиштүү тараптардан болсо, бизге байланыштуу туура эмес маалыматтарды таратпооңуздары суранабыз", - деди Тай-Мурас Ташиев.

Белгилей кетсек, буга чейин Мамлекеттик салык кызматы тарабынан даярдалган «Өз адамдар үчүн мунай: Кыргызнефтегазды кантип курутушту» аттуу иликтөөнүн видеоматериалдары жалпыга маалымдоо каражаттарында жарыяланган. Аталган материалдарда «Кыргызнефтегаз» ААКтын кызматкерлери тарабынан мүмкүн болгон мыйзамсыз аракеттер жөнүндө маалыматтар камтылган.

Көрсөтүлгөн маалыматтарга ылайык, ишкананын айрым кызматкерлери кызматтык абалынан кыянаттык менен пайдаланып, байланышы бар компаниялар менен сүйлөшүп алып, күйүүчү-майлоочу материалдарды сатуу жана өткөрүү боюнча мыйзамсыз схемаларды уюштурушкан. 

Текшерүүнүн жүрүшүндө кызматкерлер «Кыргызнефтегаз» ААК стратегиялык маанидеги жана толугу менен мамлекеттик менчикте экенин билишип, ошондой эле анын ишмердүүлүгүн мамлекеттин жана коомдун кызыкчылыгына натыйжалуу жүргүзүү милдети жүктөлгөнүн түшүнүп туруп, бул милдеттерге каршы аракеттенишкени аныкталган.

Республикада күйүүчү-майлоочу материалдарга болгон баалар өсүп жаткан шартта, абалды турукташтыруу боюнча чараларды көрүүнүн ордуна, алар бул тармакты үстүнөн караган жана көзөмөлдөгөн функцияларын аткарган мамлекеттик органдардын азырынча такталбаган кызмат адамдары менен алдын ала сүйлөшүүгө барышкан. Натыйжада айрым байланышкан компаниялар үчүн ыңгайлуу шарттар түзүлүп, өздөрү жана башка жактар үчүн мыйзамсыз материалдык пайда табууга, анын ичинде салыктарды жана башка милдеттүү төлөмдөрдү төлөөдөн качууга мүмкүнчүлүк түзүлгөн.

Бул факт боюнча Ички иштер министрлигинин Тергөө кызматы тарабынан Кыргыз Республикасынын Кылмыш-жаза кодексинин 336-беренеси («Коррупция») боюнча кылмыш иши козголду.

Азыркы учурда Мамлекеттик салык кызматынын адистерин тартуу менен кылмыш иштин бардык жагдайларын толук жана калыс иликтөөгө жана ошондой эле күнөөлүү адамдарды аныктап, кылмыш жоопкерчилигине тартууга багытталган тиешелүү тергөө аракеттер жүргүзүлүүдө.