АКШнын президенти Дональд Трамптын администрациясы чет өлкөлөрдөгү дипломатиялык саясатты реформалоонун алкагында болжол менен 30 карьералык дипломатты — элчилерди жана элчиликтердеги башка жогорку кызматтагы кызматкерлерди кызматтан чакыртып алууда. Бул кадам президент Трамптын «Америка — баарынан мурда» деген приоритеттерин толук колдогон кадрларды тартууга багытталган. Бул тууралуу arabnews жазып чыкты. 

Мамлекеттик департаменттин эки кызматкери ички кадрдык өзгөрүүлөр тууралуу анонимдүү негизде билдиргендей, кеминде 29 өлкөдөгү дипломатиялык миссиялардын жетекчилерине өткөн аптада алардын ыйгарым укуктары январь айында аяктай турганы тууралуу кабар берилген.

Аталган элчилердин баары Байдендин администрациясы учурунда дайындалган, бирок Трамптын экинчи мөөнөтүнүн алгачкы айларындагы негизинен саясий дайындоолорго багытталган «тазалоодон» аман калышкан. Бирок шаршемби күнү Вашингтондогу расмий өкүлдөрдөн жакын арада кызматтан кетери тууралуу билдирүүлөр келе баштаган.

Элчилер президенттин каалоосу боюнча кызматка дайындалат жана адатта үч-төрт жыл иштешет. Кадрдык өзгөрүүлөргө туш болгон дипломаттар дипломатиялык кызматтан толук четтетилбейт, кааласа башка тапшырмалар үчүн Вашингтонго кайтып келе алышат, деп билдиришти расмий өкүлдөр.

Мамлекеттик департамент кызматтан чакыртылган элчилердин так саны же аты-жөнүн атоодон баш тартты, бирок бул өзгөрүүлөрдү «ар бир администрация үчүн кадимки практика» деп атады. Ошондой эле элчи «президенттин жеке өкүлү» экенин жана президент «Америка — баарынан мурда» саясатын илгерилеткен адамдарды тандап алуу укугуна ээ экенин белгиледи.

Кызматтан бошотуу эң көп Африка континентине таасир этти. Бул аймакта 13 өлкөдөгү элчилер чакыртылды: Бурунди, Камерун, Кабо-Верде, Габон, Кот-д’Ивуар, Мадагаскар, Маврикий, Нигер, Нигерия, Руанда, Сенегал, Сомали жана Уганда.

Экинчи орунда Азия турат — өзгөрүүлөр алты өлкөгө тиешелүү болду: Фиджи, Лаос, Маршалл аралдары, Папуа — Жаңы Гвинея, Филиппин жана Вьетнам.

Европада төрт өлкө (Армения, Македония, Черногория жана Словакия), Жакынкы Чыгышта эки өлкө (Алжир жана Египет), Түштүк жана Борбор Азияда (Непал жана Шри-Ланка), ошондой эле Батыш жарым шарда (Гватемала жана Суринам) бул өзгөрүүлөргө дуушар болду.

Элчилердин чакыртылып алынышы тууралуу алгач Politico басылмасы жазып чыгып, бул кадам айрым мыйзам чыгаруучулар менен америкалык дипломаттардын кызыкчылыгын коргогон кесиптик союз тарабынан тынчсыздануу жаратты.