АКШ Конгрессиндеги айрым мыйзам чыгаруучулар президент Дональд Трампка эгерде ал Данияга караштуу Гренландия аралын аскердик жол менен басып алуу чечимин кабыл алса, ага каршы импичмент жараяны башталышы мүмкүн экенин эскертишти. Бул тууралуу Reuters агенттиги маалымдады.

Маалыматка ылайык, эскертүү мамлекеттик катчы Марко Рубио жана Ак үйдүн жогорку кызматтагы өкүлдөрү аркылуу Трампка жеткирилген. Демилге негизинен республикачыл конгрессмендер тарабынан көтөрүлүп, алар мындай кадам АКШнын Конституциясына, эл аралык укукка жана өлкөнүн союздаштары менен болгон стратегиялык мамилелерине олуттуу зыян келтирерин белгилешкен.

Конгресстеги мыйзам чыгаруучулар эки партиядан тең президенттин администрациясын Гренландияны күч менен алуу идеяcынан баш тартууга чакырып, мындай аракет АКШны НАТО союздаштары, айрыкча Дания менен ачык саясий кризиске түртүшү мүмкүн экенин билдиришти. Алардын пикиринде, мындай кадам эл аралык коомчулукта АКШнын аброюна олуттуу сокку уруп, дүйнөлүк коопсуздук архитектурасын солгундата алат.

Трамп буга чейин Гренландияны АКШнын «коргоосуна алуу» керектигин айтып, арал Россия менен Кытайдын таасиринин күчөшү алдында турат деген жүйө келтирген. Анын администрациясы бул аймак Арктикадагы геосаясий атаандаштыкта стратегиялык мааниге ээ экенин, табигый ресурстарга байлыгын жана аскердик-инфраструктуралык потенциалын баса белгилеп келген.

Бирок Конгресстеги сынчылар президент мыйзам чыгаруучу орган менен кеңешпестен ири аскердик операция башташы мүмкүн деген кооптонуу бар экенин айтышууда. АКШ Конституциясына ылайык, согуш жарыялоо укугу Конгресске таандык, ошондуктан президенттин мындай кадамы мыйзам бузуу катары бааланып, импичментке негиз болушу мүмкүн.

Аналитиктердин пикиринде, Гренландия маселеси АКШнын ички саясий балансында олуттуу сыноо болуп жатат. Бир жагынан, Арктикадагы таасирин кеңейтүү стратегиялык кызыкчылык катары каралса, экинчи жагынан, күч колдонуу АКШны союздаштары менен тирешүүгө алып келип, эл аралык укуктук нормаларга каршы келет. Ушундай шартта Конгресстин позициясы президенттин тышкы саясий чечимдерине олуттуу тоскоолдук жаратып, бул теманын жакынкы мезгилде да саясий күн тартибинен түшпөй турганын көрсөтүүдө.