АКШнын мурдагы президенти Дональд Трамп Украинанын президенти Владимир Зеленский менен телефон аркылуу сүйлөшүүсүндө аны тез арада тынчтыкка жетишүүгө үндөгөнүн айтты. Трамп Fox News телеканалына берген маегинде сүйлөшүүлөрдүн чоо-жайын ачыктады.

«Мен бул аскердик жаңжалды токтотуу керек деп айттым. Сиздердин алдыңыздарда согуш машинасы турат. Алар согушуп жатышат. Алар Гитлерди талкалашкан. Алар Наполеонду жеңип алышкан», - деди экс-президент, «орустар жөнүндө айтып жатканын» тактап.

Трамптын айтымында, Зеленский менен сүйлөшүүдө ал украиналык “жазгы чабуул эч качан болбогонун” жана орус тарап “миллиондогон миналарды орнотконун” баса белгилеген. Трамп Украинадагы салгылашууларды “болбошу керек болчу” жана аны "толук башаламандык” деп атады.

Зеленский Трамп менен телефон аркылуу сүйлөшкөнүн, анын жүрүшүндө америкалык саясатчы менен жеке жолугушууну макулдашканын айткан.