ЦРУнун жана Улуттук коопсуздук агенттигинин (NSA) мурдагы кызматкери Эдвард Сноуден орус паспортун алганын анын адвокаты Анатолий Кучерена Интерфакс агенттигине билдирди.

«Эдвард кечээ Россия Федерациясынын жаранынын паспортун алып, мыйзам чегинде ант берди», - деп айтылат маалыматта.

Америкалык бул окуяны кандай кабыл алды деген суроого, анын өкүлү мындай деп жооп берди: «Албетте, ал Россия Федерациясынын жарандыгын алганына ыраазы, азыр Россия Федерациясынын толук кандуу жараны. Эң негизгиси, Орусиянын Конституциясына ылайык, аны чет мамлекетке экстрадициялоону улантуу мүмкүн эмес», - деди Кучерена.

Ал ошондой эле Сноудендин жубайы да орус жарандыгын алганы жатканын айтты. «Учурда жарандык алуу үчүн керектүү документтерди чогултуп жатабыз. Процесс көп созулбайт деп ойлойм», - деди адвокат.

Сентябрдын аягында Россиянын президенти Владимир Путин «Россия Федерациясынын жарандыгына кабыл алуу жана Россия Федерациясынын жарандыгынан чыгуу жөнүндө» жарлыкка кол койгон, ал, атап айтканда, Сноуденге Россия Федерациясынын жарандыгын берген.

2013-жылы Сноуден маалымат каражаттарына АКШнын чалгындоо кызматтарынын дүйнө жүзү боюнча байкоо жүргүзүү программалары тууралуу маалымат берген. Басылмалар кеңири резонанс жараткан АКШда ага тыңчылык жана мамлекеттик мүлктү уурдоо боюнча сырттан айып тагылган. Сноуден алгач АКШдан Гонконгго, андан соң Орусияга качкан.

Булак: NazarNews.kg