Кыргыз тарап Тажикстан менен чектешкен аймакка алып келген кошумча күч жана каражаттарын мурдагы жайгашкан жайларына алып кетти. Бул тууралуу УКМКнын маалымат кызматы кабарлады.

Билдирмеге караганда, 29-январь саат 10:30га карата кыргыз-тажик чек арасында абал туруктуу.

"Кечээ, 28-январда, эки тараптын делегациялары жолугуп, жыйынтыгында Кыргызстан менен Тажикстандын биргелешкен комиссиясынын иштөөсү пландаштырылган. Кыргыз тарап чек арага алып келген кошумча күч жана каражаттарын мурдагы жайгашкан жайына алып кетти", — деп жазылат маалыматта.

Учурда чек ара кызматкерлери штаттык режимде иштеп жатат. УКМКнын Чек ара кызматы аймактагы кырдаалды көзөмөлдөп турары айтылды.

ИИМ Баткен облусунун ички иштер башкармалыгынын өкүлдөрү башка күч түзүмдөрү менен күчөтүлгөн тартипте иш алып барып жатканын билдирди. Түндө эч кандай окуялар болбогону айтылып, милиция элге түшүндүрүү иштерин жүргүзүүдө.

Чек арадагы жаңжалдын чоо-жайы

27-январь күнү саат 17:50 чамасында Төрт-Көчө аймагына тажик жарандары оор жүк ташуучу автоунаага таш жүктөп келишкен. Аны Баткен — Исфана автожолуна түшүрүп жолду жаап, өздөрү ошол жерде Тажикстандын чек арачыларынын коштоосунда жүрүшкөн. Эки өлкөнүн чек ара өкүлдөрүнүн жолугушуусунун жыйынтыгында жол каттамы ачылган. Кырдаалды жөнгө салуу аракетине карабастан тажик тарап чек аранын башка аймагында, тактап айтканда, Чыр-Дөбө деп аталган жерде Кыргызстандын аскер кызматкерлерин көздөй миномёт жана гранатомёттордон ок чыгарышкан. Андан кийин тажик чек арачылары Төрт-Көчө аймагында Кыргызстандын аскерлерди аткылаган. Чек ара кызматы Тажикстандын аскер кызматкерлеринин аракеттери жеринен координацияланганы, алардын бул чагымчылдык аракетке мурдатан даярдык көргөнү байкалганы айтылган.

Ал эми коңшу өлкө башаламандык Сомониён айылынан Чоркухка бараткан тажикстандыктар ташка алынганынан улам чыкканын айтып жатат. Кийинчерээк Тажикстандын УКМКсы окуя Ходжаи-Аъло аймагынан Сомониёнго кетчү жолдо болгонун кабарлаган. Алардын айтымында, кыргызстандыктар тажикстандык жарандын Porter автоунаасын токтотушкан. Sputnik Тажикстан агенттигинин жазганына караганда, эки киши каза таап, 10 адам ар кандай жаракат алган.

Таңга маал эки тараптын чек арадагы атышууну жөнгө салуу боюнча сүйлөшүүсү аяктап, бир нече пунктудан турган макулдашуу кабыл алынды. Анын ичинде ок атууну токтотуу да каралган.

Кечээ эртең менен жерине УКМК төрагасы Камчыбек Ташиев менен өзгөчө кырдаалдар министри Бообек Ажыкеев барган. Эвакуацияланган эл үйлөрүнө кайтууда.

Булак: NazarNews.kg