Өкмөттүн Чүй облусундагы мурунку өкүлү Туйгунаалы Абдраимов суракка катышып туруу милдети менен үйүнө жөнөтүлгөнүн УКМКнын басма сөз кызматы бүгүн, 21-сентябрда «Сводка.АКИpress» редакциясына билдирди.

Т.Абдраимов мыйзамсыз байыган фактылар аныкталганын 20-сентябрда УКМКнын басма сөз кызматы тараткан.

Расмий билдирүүдө: «Тергөө учурунда «А.Т.Д.» жогорку мамлекеттик кызматтарда иштеп жаткан учурунда кызматтык абалын кыянаттык менен пайдаланып, мыйзамсыз баюу жана материалдык пайдалар менен артыкчылыктарга ээ болуу үчүн, мыйзамсыз түрдө активдерин көбөйткөндүгү, легалдаштыруу максатында Бишкек шаарынын жана Чүй облусунун аймагында өзүнүн расмий кирешесинен бир нече эсе жогору турган кыймылдуу жана кыймылсыз мүлктүн кымбат объектилерин сатып алганы жана ошондой эле Кыргыз Республикасынын бир катар коммерциялык банктарына финансылык инвестицияларды салганы аныкталды. Ошол эле учурда кылмыш жоопкерчилигинен качуу үчүн бул активдерди башка адамдардын атына каттаган. Белгиленген мыйзамсыз аракеттердин натыйжасында "А.Т.Д." жакын туугандарына жана аффилирленген адамдарга 16 батир, 18 жер тилкеси, 2 унаа токтотуучу жай, 5 турак жай, 3 дыйкан чарба, 16 автоунаа жана ошондой эле «Ысык-Ата» курортунун территориясында бүтпөгөн курулуш объектилерди каттаган. 

"А.Т.Д." жана анын жакын туугандары активдери, киреше жок болгон учурда да кескин көбөйүп, 250 миллион сомдон ашык бааланган. УКМК чогулткан материалдардын негизинде Кыргыз Республикасынын Кылмыш-жаза кодексинин 323-беренесинин 2-бөлүгүнүн 1-пункту (мыйзамсыз баюу) боюнча сотко чейинки өндүрүшкө катталып, бул иштин алкагында бул кылмышты жасоого тиешеси бар адамдарды жана алар мыйзамсыз алган мүлктү аныктоого багытталган ыкчам-тергөө иш-чаралардын комплекси жүргүзүлүүдө», - деп айтылат.

Булак: NazarNews.kg