Кара жолдуу артист Рахат Сулайманов эч кимди жыргатып жиберген жок. Ал Ысык-Көл облусунун губернатору Кыдыкбек Исаевге пресс-катчысы болгон, анын мойнуна 10 жыл илинди, өзү сайда-саны жок качып жүрөт. УКМКнын төрагасы Абдил Сегизбаевдин пресс-катчысы болгон анын мойнуна кылмыш иши козголгону турат. Андан соң УКМКнын экс-төрагасы Опумбаевдин  пресс-катчысы болгон. Анысы да дардалаңдап качып жүрөт. Рахат Сулайманов каякка барса жетекчилерин аңга тыгып, өзү 5-каналга жетекчиликке умтулду.

Белгилей кетсек, буга чейин 5-каналды  Эрнис Кыязов жетектеп келген. Социалдык тармактагы кечки жаңылык 5-каналдын жетекчиси Эрнис Кыязовдун кызматтан кетиши менен коштолду. Бул көрүнүшкө тележурналист төмөнкүчө жооп жазган. "..ээси келсе бээсин бер" дегендей бүгүн Бешинчи каналга өйдө жактан "катталар" келип калыптыр капыл-тапыл. "Бээни ушул киши минип чапкылап көрсүн" деген Маммүлк фондусунун, жеке акционердин чечимин көтөрө келишиптир. Бээни минчү киши өзүм тааныган эле досум, тв майданда илгери далай отту-сууну бирге кечишкен чекист-досум Рахат Сулайманов деген таанышым экен. Былтыр октябрда күргүштөп келип "телеканалды басып алабыз, тартып алабыз" деген басмачы кишилердей эмес түрлөрү. Өкүматтык кагаз менен, сылык-сыпаа, жадырап жайнап келишти эле жадырап тосуп алдым. "Колунан иш келбей кетип аткан жокмунбу айтор?" деп жылмайсам, "сизге жетекчилик ыраазы, колуңуздан келишинче телеканалга салым коштуңуз, жакшы иштедиңиз" дешти бир ооздон. Андай болсо жакшы экен деп, өкүмөттүн акырынан жем жеген Бешинчи каналды Рахатка карматып, жамааттын көзүнчө ийгилик кааладым. "Момундай-тигиндей проекттерди ачып, саясий тараптардын баарын чакырган тв долбоорлорду кыялданып, планын чийип аттым эле, эми ушунун баарын туура десең ишке ашыр досум" деген каалоолорду айттым Ракеге. Өзүм барып Рахатты креслого олтургузуп " Кудай өзү туура жолдон адаштырбасын, оомин" деп бата бердим.

Чогулушка жыйналган жамаат кандайдыр трагедия болгонсуп улутунуп, сумсайышат, "баары жакшы болот, негизгиси, айлык акыңар буюрса стабилдүү болот" деп жадырай тамашаладым. Иш бөлмөмдө көп деле ташына турган буюм-тайымым жок экен, жайнамазымды алдым да, кошуна кабинеттеги аксакал кеңешчим Нарын Айып агага жолугуп ыраазылык айтып, а кишинин ыраазылык батасын алып, Рахатка "..досум, бизди бир сүрөткө тартып койчу" деп бир-эки ирмем сүрөткө түштүк.

Ошол достор, эртең буюрса таң заарлап чыгыштан баягыдай эле таң атат, короздор кыйкырбаса деле Күн чыгат...Тирүүлүк уланат. Пенделер күн сайын өзү менен өзү күрөшмөйдү улантат. Кудайга шүгүр, таланттуу жамаат менен иштешкениме, ошол тагдырды буюрган Жаратканга рахмат! Бешинчи каналда колуман келишинче өз потенциалымды жумшоого аракет кылдым, кимди таарынтсам, капа кылсам, "ушул жигит момундай иштерди кылса болмок" деп кимдир бирөөлөрдүн үмүтүн, ишеничин актай албай калсам кечирим сурайм. Аллах өлкөбүздү, өлкөдө жашаган баарыбызды сактасын, оомин!

Айтмакчы, бүгүн эле эртең менен катчы кызыбыз " Эрнис байке, Бешинчинин ютуб каналындагы катталуучулар 100 миңден ашты деди эле. Эки жылда балким бул аз эле көрсөткүчтүр, бирок сан үчүн эмес сапат үчүн иштеген жамаатка ыраазылык билдирем, рахмат жамаат! – деп жазган белгилүү журналист Эрнис Кыязов.

Азизбек КЕЛДИБЕКОВ, NazarNews.kg