Украина Европа биримдигине (ЕБ) кирүүгө талапкер макамын быйыл июнь айында алышы мүмкүн. Бул тууралуу өлкөнүн европалык жана евроатлантикалык интеграция маселелери боюнча вице-премьер-министри Ольга Стефанишина билдирди.

"Украина ЕБге мүчө болуу үчүн анкета алды. Биз буга чейин өтө чоң даярдык иштерин аткарганбыз, ошондуктан тез аракеттенүүгө даярбыз", - деп жазды Стефанишина Twitter'ге.

8-апрелде Еврокомиссиянын башчысы Урсула фон дер Ляйен Киев шаарында Украинанын президенти Владимир Зеленский менен жолугуп, ага ЕБге кирүү боюнча сүйлөшүүлөрдү баштоо үчүн анкетаны тапшырган.

"Силердин ЕБге карай жолуңар башталды. Бул кыска жол болот", - деп билдирген Еврокомиссиянын башчысы. Ошол эле маалда ал талапкер макамын алуу жараяны адатта бир канча жылды талап кыларын, бирок Украина үчүн бул бир нече аптага гана созуларын белгилеген.

Эске салсак, Орусия Украинага каршы согушту 24-февралда баштаган. Путин анын максаты «сегиз жылдан бери Киев режиминин басмырлоосуна, геноцидине кабылып келгендерди коргоо» жана бул үчүн "Украинаны демилитаризация жана денацификация" жасап жана Донбасстагы "жай жашоочулардын канына забын болгондорду" аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Булак: NazarNews.kg