Украинанын көзөмөлүндөгү аймактарда учурда болгону 22–25 миллион адам жашайт. Мындай маалыматты өлкөнүн социалдык саясат министри Денис Улютин билдирди. Ал эми 2019-жылдагы электрондук эл каттоодо Украинада 37 миллиондон ашык адам жашаганы көрсөтүлгөн. Бул тууралуу NazarNews агенттигине кытайлык CCTV-plus маалымдады.

Украинадагы демографиялык абал оор бойдон калууда. Өткөн жылы өлкөдөн дагы 500 миңдей жаран чыгып кеткен. Ошол эле учурда украиналык бизнес өкүлдөрүнүн 75 пайызы жумушчу күчү жетишпей жатканын билдиришүүдө.

Эксперттердин айтымында, өзгөчө курулуш, айыл чарба, логистика, медицина жана билим берүү тармактарында кадр тартыштыгы күч. Бирок украиналыктарды кайра өлкөгө кайтаруу аракеттери экономикалык оор кырдаалга байланыштуу кыйынчылык жаратууда.

Социологдор Украина “ири демографиялык ажырымдын” босогосунда турганын айтышууда. Анткени чет өлкөгө кеткен адистер акырындык менен Европа өлкөлөрүнө толук кандуу интеграцияланып, кайра кайтууну каалагандар азайып бара жатат.

Жакында Украина президентинин кеңсесинин башчысы Kyrylo Budanov эмгек мигранттарын тартуу боюнча тобокел өлкөлөрдүн тизмесин кайра карап чыгуу тапшырмасын берген. Учурда бул тизмеде 70 мамлекет бар. Алардын арасында Ооганстан, Египет, Ирак жана Бангладеш сыяктуу өлкөлөр дагы кирет. Украиналык компаниялар бул мамлекеттерден жумушчуларды алып келе баштаганы маалымдалууда.

Киев тургундарынын пикири ар түрдүү болууда. Айрымдары чет элдик жумушчу күчү керек экенин айтса, башкалары украиналыктар үчүн жакшы шарт түзүлүшү зарыл деп эсептешет.

2026-жылдагы маалыматтар Украина “демографиялык кайчыга” кабылганын көрсөттү: өлкөдө бир төрөлгөн балага үч өлүм туура келет. Ал эми калктын орточо жашы 41 жаштан ашкан.

Учурда Украина оор тандоонун алдында турат. Бир тараптан — калкы азайып, кадр жетишпеген шаарлар менен айылдар. Экинчи тараптан — бюджеттик кыйынчылыктар жана социалдык чыңалуу. Украиналыктарды кайтаруу программалары азырынча натыйжа бере элек болгондуктан, бизнес өкүлдөрү жумушчу күчүн Түштүк-Чыгыш Азия жана Жакынкы Чыгыш өлкөлөрүнөн издөөдө.