Урмат Абдукаимов Кыргыз Республикасынын U-23 Олимпиадалык курама командасынын башкы машыктыруучусу болуп дайындалды. Бул тууралуу Кыргыз футбол биримдиги билдирди.

Бул кызматта ал Эдмар Ласерданы алмаштырды.

Белгилей кетсек, бул чечим КФБ тарабынан бекитилген Кыргыз Республикасынын футбол боюнча U-16-U-23 Улуттук курама командаларынын иш алып баруу концепциясынын алкагында кабыл алынды. Аталган концепцияга ылайык, Кыргыз футболунда туруктуу өнүгүүнү жана натыйжалуу системаны түзүү максатында, Кыргызстандын U-23–U-16 курама командаларынын башкы машыктыруучулук кызматтарына тиешелүү квалификацияга ээ болгон ата мекендик адистер гана дайындалышы керек. Учурда бул милдетти ийгиликтүү ишке ашырууга жетиштүү деңгээлде квалификациялуу жергиликтүү машыктыруучулар бар.

Урмат Абдукаимов - АФКнын «А» категориясындагы лицензияга ээ тажрыйбалуу адис. Ал буга чейин улуттук курама командада убактылуу башкы машыктыруучу болуп иштеген. Учурда Премьер-Лиганын «Талант» клубун жетектеп, Кыргыз футбол биримдиги тарабынан уюштурулган машыктыруучуларды даярдоо курстарында жана семинарларда инструктор катары да иш алып барууда.

Урмат Абдукаимов U-23 Олимпиадалык курама командасын 2026-жылдын сентябрь айында өтө турган Азия оюндарына даярдайт.

Кыргыз футбол биримдиги Урмат Абдукаимовго жаңы кызматында жана алдыдагы жооптуу мелдешке даярдык көрүү иштеринде ийгиликтерди каалайт.