Орусиянын БУУдагы туруктуу өкүлү Василий Небензя Бучадагы материалдарга комментарий берип жатып Батыштын жана Украинанын ЖМКлары тараткан маалыматка бир гана дилетанттар ишенерин билдирди. Бул тууралуу РИА Новости жазды.

Ал таратылган видеону фейк деп атап, ал жерде жаткандар үч-төрт күн көчөдө калган адамдын сөөгүнө окшобой турганын белгиледи.

“Сиздер сөөктөрдү көрдүңүздөр, айтылгандарды уктуңуздар. Бирок сиздерге көрсөткүсү келген жактарын гана көрө алдыңыздар. Украиналык жана батышчыл ЖМКлар таратып жаткан окуялардын карама-каршы версияларын көрө албайсыздар. Орусиялык аскерлер чыгып кеткенден кийин шаарда адамдын сөөктөрү жок экенин бир нече видеолор күбөлөндүрүп турат”, — деди ал.

Ошондой эле Небензя Украина президенти Владимир Зеленскийди акыркы украин калганга чейин согушууга даяр турган Батышка өз планын ишке ашырууга жол бербөөгө чакырды.

Зеленский Бучадагы окуяларды Экинчи дүйнөлүк согуштан кийинки "эң коркунучтуу аскердик кылмыш" деп атады. Бул украин жергесинде "41 күндөн бери баскынчылар жасап жаткан жоруктардын бир эле мисалы" деп белгиледи. Анын айтымында, орус аскерлерлери кыйроолор, жапырт көрүстөндөрдү калтырып кетишкен.

Ал эми Зеленский "жүз миңдеген" украиналыкты Орусияга депортациялашканын айтып, орусиялыктар украиндерге таандык ар бир нерсени – тамак-ашынан баштап алтын буюмдарына чейин уурдоодо деп айыптады.

Президент БУУну Орусияга каршы санкция киргизүүгө гана эмес, ал өлкөнү Коопсуздук кеңешинен чыгарууга чакырды. Ал ошондой эле БУУнун хартиясын реформалоо керектигин, Экинчи дүйнөлүк согуштан кийин нацисттерди соттогондой эл аралык трибунал түзүү зарылдыгын кошумчалады.

Орусиянын бийлиги айыптоолорду четке кагып, орус аскерлеринин Бучадагы кылмыштары тууралуу маалыматтарды Москваны каралоону көздөгөн "чагым" деп сыпаттаган. Кремль аскерлер Бучадан 30-мартта чыгарылганын айтууда.

Бирок Maxar Technologies фирмасынын марттын ортосунда спутниктен тартылган сүрөттөрүндө Бучанын көчөлөрүндө жаткан сөөктөр көрүнүп турат.

Эске салсак, Орусия Украинага каршы согушту 24-февралда баштаган. Путин анын максаты "сегиз жылдан бери Киев режиминин басмырлоосуна, геноцидине кабылып келгендерди коргоо" жана бул үчүн "Украинаны демилитаризация жана денацификация" жасап жана Донбасстагы "жай жашоочулардын канына забын болгондорду" аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Булак: NazarNews.kg