Биринчи май райондук сотунда окумуштуу жана Манас таанучу Гүлзат Ааливанын соту уланууда. Ал – диний араздашууну козуткан деп күнөөлөнүп, былтыр апрелде камакка да алынган, бирок кийин үй камагына чыгарылган.

Сотто сүйлөгөн сөзүндө Аалиева көптөгөн илимий факттар менен өз турумун жактап жатат, бирок негизгиси – анын динчилерге карата сыны жооп катары башталган, анткени ашынган динчилер Нооруз менен Жаңы жылды белгилебегиле, динге каршы чыккандарды өлтүрүш керек деп, алар менен макул болбогондорду уят сөздөр менен сөгүп, Манасты дагы мазактаган.

Учурдагы динаятчылар кандай болбосун ачык атаандаштыктан коркот жана илимий негизде дискуссия жүргүзө албайт, алар, негизинен, бир жарым миң жыл мурдагы катып калган түшүнүктөрдү гана кайталайт, бийлик болсо аларга каршы сөз айткандан да коркот жана дал ошол себептен ушундай сотттор пайда болууда.