«Субан уулу» коомдук фондунун төрагасы Кубанычбек Адылов: Акыркы мезгилде өлкөбүздүн экологиясы бузулгандан бузулуп эле баратат, кендерди иштеткен чет өлкөлүк ишканалар жаратылышка жырткычтык мамиле кылат, анткени өлкөнүн кызыкчылыгын ойлобойт. Сайда жаткан асыл таштарды же тоодо өскөн дары чөптөрдү чет өлкөлүк ишкерлер текейден арзан алып келип жатат. Бирок андан да жаманы – биздин өзүбүздүн жетекчилер дагы ал жөнүндө ойлобой, күнүмдүк кызыкчылык менен жашап калганында.

Мисалга, ХХ кылымдын башында белгилүү манап Мусакожо Ысрайыл уулу Чүйдөн бир нече жүз кыргоол алдыртып келип, аларды Ак-Талаага агытыптыр, кыргоолду кайтарганга кароол да койдуруптур. Башка бир манап – Эсенгул бий – чоң бак тиктирип, парк уюштурган экен, бирок кийин, 1920-1930-жылдарда алар кулакка тартылганда, эски доордун калдыгы деп карапайым эл ал парктагы дарактын баарын кыйып салган экен. Жүз жылдан кийин биз азыр ошол манаптардын деңгээлине жете албай келебиз...