CNN телеканалы Беларусь менен Украинанын чек арасындагы Веселовка-Сеньковка чек ара бекетинен орусиялык унаалардын кербени өтүп бара жаткан сүрөт жана видеону жарыялады. Сүрөттөр Украинанын чек ара кызматынын видеокамераларынын трансляциясынан алынган.

«Видео Украинанын Сеньковка менен Беларусиядагы Веселовка менен кесилишкен жерде тартылган. Колонна Украинанын кире беришинде жергиликтүү убакыт боюнча саат 6:48 чамасында көрүнгөн», — деп айтылат маалыматта.

Украинанын Чек ара кызматы мурдараак орус аскерлери жергиликтүү убакыт боюнча таңкы саат 5тер чамасында «Беларусиянын колдоосу менен» Украинанын чек арасын бузганын жарыялаган. Чек ара Луганск, Сумы, Харьков, Чернигов жана Житомир аймактарында бузулганын украин чек арачылары билдирди.

Орусиянын Коргоо министрлиги буга чейин орус аскерлери Украинадагы аскердик инфраструктурага, авиацияга, абадан коргонуу объекттерине жана аскерий аэродромдорго сокку уруп жатканын билдирген. «Жеңил калкка эч нерсе коркунуч туудурбайт», - деп айтылат департаменттин билдирүүсүндө.

Белгилей кетсек, буга чейин Украинада аскердик абал киргизилгени кабарланган

Эске салсак, 21-февралда Путин Украинанын чыгышындагы жикчилдердин Донецк Элдик Республикасы жана Луганск Элдик Республикасы түзүлүштөрүн көз карандысыз мамлекет катары тааный турганын жарыялаган. Алардын лидерлери менен кызматташуу келишимине кол койгон. Чечимди Мамдума 22-февралда ратификациялады, ошол эле күнү Федералдык кеңеш орус аскерлерин Донбасста колдонууга уруксат берди.

24-февралда таңга жуук Орусиянын президенти Владимир Путин кайрылуу кылып, Донбаста атайын аскердик операция жүргүзүү тууралуу чечим кабыл алганын айтты.

Украинанын президенти Владимир Зеленский Орусиянын аракетин өз өлкөсүнүн суверенитетин бузуу катары баалады. Украин парламенти башка өлкөлөргө кайрылып, жикчилдер ээлеп турган Украинага караштуу аймактарды Орусиянын артынан тааныбоого чакырды. Батыш өлкөлөрү жана НАТО, Евробиримдик да Москванын кадамын кескин айыптады.

Кремлдин соңку чечими Донбасста кырдаал курчуган маалда кабыл алынды. Өз кезегинде Орусия Украинанын тегерегине 150 миңдей аскерин жыйнаган.

2014-жылы Орусия Украинага караштуу Крым жарым аралын аннексиялап алган. Ошол эле жылы Украинанын чыгышындагы Донецк жана Луганск облустарындагы Москвага таянган жикчилдер Референдум делген добуш берүү өткөрүп, өзүн-өзү Донецк Элдик Республикасы жана Луганск Элдик Республикасы деп жарыялашкан.

Москва Украинага карата агрессияны жана жикчилдерди колдогонун төгүндөп келген. Эки аймакты тең Орусиядан башка эч ким мамлекет катары тааныган эмес, алар экөө биригип Донбасс деп аталат. 

Булак: NazarNews.kg