Укук коргоочулар менен чет өлкөлүк саясий лидерлер Орусиянын бийлигин оппозиционер Алексей Навальныйды бошотууга чакырышты. Ал 17-январь күнү кечинде Германиядан Москвага учуп келгенден кийин аэропортто кармалган.

Орусиянын Жаза аткаруу боюнча федералдык кызматы Навальный «Ив Роше» компаниясынын ишине байланыштуу шарттуу сот жазасын реалдуу жазага алмаштыруу боюнча доо арыздын негизинде кармалганын белгилеп, анын шарттуу мөөнөтү 3,5 жылга эркинен ажыратуу жазасына алмаштырылышы керектигин билдирүүдө. Бул маселе боюнча саясатчынын соту 29-январга белгиленди. Ага чейин 48 сааттын ичинде анын бөгөт чарасы каралышы керек.

Навальный Москва аэропортунда журналисттер менен болгон кыска маегинде кармаларын билгенин, бирок Орусияга кайтып келүү планынан баш тартпаганын айтты.

"Они действительно поставили авиационную безопасность огромного, прекрасного города под угрозу. Зачем? Как Путин сказал? «Да кому он нужен?». Я прилетел сюда. Я абсолютно счастлив, что прилетел". Выступление Алексея Навального в Шереметьеве - https://t.co/YegW3PGlMQ pic.twitter.com/HccDvXHNul

— Радио Свобода (@SvobodaRadio) January 17, 2021

Эл аралык укук коргоо уюмдары Навальныйдын кармалышында саясий боёк бар деп эсептешүүдө. Amnesty International уюму саясатчыны абийир туткуну деп атап, кармоо — анын «оозун жабуу» аракети экенин билдирди. Өз кезегинде Human Rights Watch уюму Навальный саясий себептерден улам кармалганын белгилеп, аны бошотууга чакырды. Европа Кеңешинин төрагасы Шарль Мишель Кремлдин 44 жаштагы сынчысынын кармалышын «жол берилбей турган жорук» катары сындап, аны тез арада бошотууну талап кылды. Ушундай эле чакырык менен Европа биримдигинин (ЕБ) тышкы саясий мекемесинин башчысы Жозеп Боррель жана Европа элдик партиясынын лидери Дональд Туск да кайрылуу жасады.

Навальныйдын кармалышын Балтика өлкөлөрүнүн Тышкы иштер министрликтери (ТИМ) да айыпташты. Алардын биргелешкен билдирүүсүндө эгер оппозициячы бошотулбаса, ЕБ Орусияга каршы санкцияларды киргизүү маселесин карашы керектиги жазылган.

Европанын башка өлкөлөрү да Навальныйды бошотууга чакырышты. Мындай пикирин Польшанын ТИМ башчысы «Твиттердеги» баракчасына орус тилинде жазды.

АКШнын шайланган президенти Джо Байдендин улуттук коопсуздук боюнча кеңешчиси Жейк Салливан Навальныйдын кармалышын айыптап, орус бийлиги алгач анын ууландырылышын иликтеши керектигин белгиледи.

Беларустун оппозициялык лидери Светлана Тихановская да орусиялык оппозиционерди колдогон билдирүү жасады.

Тихановская о задержании Навального:

«Задержание Алексея Навального в московском аэропорту – опасный шаг к лишению россиян политической альтернативы. Беларусь видела последствия такого обращения с политическими оппонентами. Это не отвечает интересам русского народа и страны». pic.twitter.com/luVVUD8hTy

— SOTA (@SotaVision) January 17, 2021

Кремлдин басма сөз катчысы Дмитрий Песков жекшемби күнү кечинде Навальныйдын кармалганы жөнүндө маалыматы жок экенин билдирди. «Кечиресиңер, аны Германияда кармаштыбы?», — деп жооп берди ал журналисттердин суроосуна.

Орусия ТИМинин өкүлү Мария Захарова батыш саясатчыларына жооп берип, мындай деп жазды: «Эл аралык укукту сыйлап, көз карандысыз өлкөнүн улуттук мыйзамдарына кол салбагыла жана өз өлкөңөрдөгү көйгөйлөр менен алектенгиле».

Навальный былтыр августта Томск-Москва учагында бараткан жеринен өзүн жаман сезип, Омск шаарындагы ооруканага жеткирилген. Көп өтпөй ал жерден Берлиндеги клиникага которулган. Европадагы бир нече көз карандысыз лаборатория ал Орусияда жасалган «Новичок» тобундагы зат менен ууландырылганын аныкташкан.

Орус бийлиги саясатчыга кол салуу фактысын тергөөдөн баш тарткан. Эл аралык иликтөөчү журналисттердин тобу ал ишке орус атайын кызматынын тиешеси болушу мүмкүн экенин аныктаган. Кремль дооматтарды негизсиз деп билдирген.

Булак: NazarNews.kg