ВИДЕО - ЕБ өлкөлөрүнүн министрлери Эрдогандын Айя-София музейи тууралуу чечимин айыпташты
Дүйнө жүзүндө  |   |  1405

Европа биримдигинин (ЕБ) тышкы иштер министрлери коронавирус пандемиясы башталгандан бери алгачкы жолу Брюсселде жолугушту. Анда күн тартибиндеги негизги темалардын бири ЕБ менен Түркиянын ортосундагы мамиле болду. Бул тууралуу Борбордук Азия жаңылыктары жазып чыкты.

Кипр менен Грекиянын министрлери чалгындоо максатында Түркиянын Кипр жээктеринде башталган мунай бургулоо иштерине карата тынчсыздануусун билдиришти.

Евробиримдиктин тышкы саясат боюнча жогорку өкүлү жана Европа комиссиясынын вице-спикери Жозеп Боррель август айында Түркияга карата чектөө чараларынын тизмеси түзүлөрүн, эгер Анкара Грекиянын эгемендик укуктарын бузса, алар күчүнө кирерин билдирди.

Түркия Евробиримдиктин Жер Ортолук деңиздин чыгыш бөлүгүндөгү аскердик-деңиз операцияларын айыптап, алар БУУ тарабынан таанылган Ливиянын улуттук келишүү өкмөтүнө жардам берүүгө тоскоолдук кылып жатканын билдирип келет. Өз кезегинде ЕБ Ливиядагы зомбулук актыларынын жайылуусунун алдын алуу үчүн бул өлкөгө курал-жарак жеткирүүгө эмбарго киргизиши керектигин айтууда.

Акыркы күндөрү европалыктар Түркиянын президенти Режеп Тайып Эрдогандын Стамбулдагы Айя-София музейинин макамын өзгөртүү жөнүндөгү жарлыкка кол койгондугуна тынчсызданышууда. «Евроньюс» дүйнөлүк маданий жана тарыхый эстеликти мечитке айлантуу чечими «бүткүл Европа биримдигинин жашоочуларынын айыптоосуна кабылганын, алар бул чечимди жокко чыгарууну талап кылып жатышканын» жазды.

Булак: NazarNews.kg

Поделитесь с друзьями