Бишкекте колунда баласы бар аялды маршруттан кууп чыккан №185 маршруттук каттамдын айдоочусу жумуштан четтетилди. Бул тууралуу Бишкек мэриясынын басма сөз кызматы маалымат таратты.

Маалыматка ылайык, мэрияга бул окуя боюнча шаар тургуну билдирип, арызданган.

"Шаардык транспорт башкармалыгынын кызматкерлери каттамдын айдоочусун таап, учурда №185 каттамдын айдоочусу жана "ТрансГруппКоммуникейшн" фирмасынын жетекчилиги менен териштирүү иштери жүрүүдө. Териштирүү жүрүп жаткан учурда айдоочу иштен убактылуу четтетилди", - деп айтылат маалыматта.

Эске сала кетсек, окуя кечээ, 5-мартта саат 17:30дар чамасында “Дордой” базарынын жанында болгон.

Аталган маршруттун айдоочусу аял жыйыла турган коляска менен түшкөнү үчүн түшүрүп салганы маалым. Коляска эч кимге тоскоолдук жараткан эмес. Ал эми аял болсо колундагы бала менен отурбай эле туруп бараткан.  

Кадрларда көрүнүп тургандай айдоочу аял көп жерди ээлеп, башка жүргүнчүлөрдү салууга тоскоолдук жараткандыктан, аны түшүрүп салган.

Негизи маршруттук каттамдын бир жүргүнчүсү жети жашка чейинки бир баланы жана 20 килограммга чейинки жүктү алып жүрүүгө укугу бар. Эгерде жүргүнчүнүн баласы 7 жаштан өткөн болсо жана жүгү 20 килограммдан ашса, ар бир 20 килограммга 10 сомдон төлөнөт.

Коомдук унаалардын иши боюнча көйгөйлөр пайда болсо төмөнкү номерлерге кайрылууга болот:

- Бишкек мэриясынын шаардык транспорт башкармалыгы: 0703075727;

- Бишкектин жүргүнчү ташуучу автотранспорттук ишканасы (автобустардын ишин карайт): 0553 022 753, 0772 173 743 (WhatsApp);

- Бишкектин троллейбус башкармалыгы: 0559733866

- "ТрансГруппКоммуникейшн" фирмасынын башчысы: - 0772 005535 Улан Абдыжалилов;

Булак: NazarNews.kg