Казакстандын президенти Касым-Жомарт Токаев 16-ноябрда Коомдук ишеним кеңешинин жыйынында сүйлөп, өкмөткө насыя боюнча карызы бар жарандарды колдоо боюнча чараларды көрүү тапшырмасын берди.

Анын айтымында, бүгүнкү күндө 540 миң казакстандыктын убагында төлөнбөгөн 354 миллиард теңге өлчөмүндөгү карызы бар.

"Каржы тармагына зыян келтирбестен, насыясын төлөй албай калгандарды колдоо үчүн кылдат чаралар көрүлүшү керек. Экинчи деңгээлдеги банктардын ийкемдүү күрөө саясатын камсыз кылуу жана мүлктү баалоо ишине көзөмөлдү күчөтүү зарыл. Зайымчыга мажбурлап алуу чарасы колдонулганга чейин күрөөгө коюлган мүлкүн үч айдын ичинде өз алдынча сатуу укугу берилиши шарт", — деди Токаев.

Президент ошондой эле мөөнөтү өтүп кеткен карыздын суммасы күрөөгө коюлган мүлктүн өз наркынын 15 пайызынан аз болуп, кечиктирүү мөөнөтү алты айдан ашпаган учурда, мүлктү өндүрүп алууну чектөө тапшырмасын берди.

Эске салсак, быйыл 20-сентябрда Алматынын Алатау районунун тургуну үй-бүлөсүн жашаган жеринен мажбурлап чыгарууга келген адамдарга ок аткан. Жыйынтыгында эки полиция кызматкери, бир сот аткаруучу, үйдүн жаңы ээси жана аны менен чогуу келген таанышы каза болгон.

Жергиликтүү басылмалардын маалыматына караганда, кылмышка шектүү 54 жаштагы Игорь Дужнов бир нече жыл мурун банктан насыя алып, кыймылсыз мүлкүн күрөөгө койгон. Төлөй албагандан кийин, банк мүлктү тартып алган.

Дужнов тергөө аяктаганга чейин эки айга камакка алынган. Бөгөт чарасы каралган сотко видеобайланыш аркылуу катышкан шектүү кылганына "өкүнүп жатканын" айтып, ошол маалда "өзүн билбей калганын", аны мындай абалга "мыйзамсыздык" жеткиргенин билдирген.

Бул окуядан кийин банктарга карызы бар айрым тургундар насыя берүүнүн шарттарына, ипотека боюнча пайыздарга жана карызы бар адамдарды жалгыз үйүнөн күчтөп чыгарууга каршы Алматыда бир нече нааразылык акцияларын өткөрүшкөн.

Булак: NazarNews.kg