19-февралда жөтөлгө каршы "Док-1 Макс" сиробуна ууланган балдардын иши боюнча соттук отурумда Өзбекстандын Фармацевтика тармагын өнүктүрүү агенттигинин мурдагы директору Сардор Кариев билдирүү жасады.

«Мен жарыш сөз учурунда жактоочуларым келтирген бардык аргументтер жана далилдер менен макулмун. Тергөө койгон айыптардын эч бири боюнча күнөөм жок деп эсептейм», - деди ал.

Анын айтымында, ал тергөөдө жана соттук териштирүүдө берген көрсөтмөсүн өзгөрткөн эмес.

«Мага каршы көрсөтмө берген адамдардын баары же көрсөтмөлөрүн өзгөртүп, же башка аргументтер менен толукташты. Бул алардын мага каршы берген көрсөтмөлөрүндө чындыктын жоктугун көрсөтүп турат. Алдын ала тергөөнүн документтери менен таанышып чыгып, жасалган иштердин баары менин артымдан, менин атымды «сатуу» менен жасалганына ынандым», - деп белгиледи соттолуучу.

Фармацевтика агенттигинин мурдагы жетекчиси ага «Док-1 Макс» сиробун өндүрүүчүлөрдү текшерүүнү жокко чыгарууга көрсөтмө берген деген айып коюлуп жатканын айтты.

«Мындай болгон эмес, мен андай көрсөтмө берген эмесмин», - деди ал.

Сардор Кариев соттон аны актоону суранды.

Прокурор буга чейин соттон агенттиктин мурдагы жетекчисин 18 жылга, ал эми дары импорттогон Quramax компаниясынын мурдагы директорун 20 жылга эркинен ажыратууну өтүнгөн. Ошондой эле мамлекеттик айыптоочу соттолуучулардан каза болгон балдардын үй-бүлөлөрүнө 100 миллион сумдан өндүрүп берүүнү сураган.

5-январда Ташкент шаардык сотунда 18 бала майып болуп калганы, дарыдан ууланып мерт болгондордун саны 69га жеткени белгилүү болгон. Дагы эки кишиге айып тагылганы, кылмышка шектүүлөрдүн саны 23 жеткени айтылган.

Булак: NazarNews.kg