Украинанын президенти Владимир Зеленский видеокайрылуусунда Мариупольдогу Азовсталь металлургиялык комбинатынын аймагынан украин аскерлери чыгарыла баштаганын билдирди.

"Биздин жигиттерибиздин өмүрүн сактап кала алабыз деген үмүтүбүз бар. Алардын арасында оор жарадар болгондор бар, аларга жардам керек", - деди Зеленский.

Зеленский аларды кийинчерээк украин бийликтери көзөмөлдөгөн аймакка кайтарууну күтүп жатканын айтты.

"Жигиттерди үйлөрүнө кайтаруу үчүн иштер уланууда. Бул иш убакытты талап кылат" - деп кошумчалады ал.

Буга чейин Россия Федерациясынын Коргоо министрлиги дүйшөмбү күнү Азовсталь аймагында блокадага алынган украиналык аскер кызматкерлеринин өкүлдөрү менен жарадар болгон украин аскер кызматкерлерин заводдон чыгаруу боюнча макулдашууга жетишкенин билдирген. Россия Федерациясынын Коргоо министрлиги ошондой эле ишкананын аймагында жымжырттык режими киргизилгенин жана гуманитардык коридор ачылганын, ал аркылуу жарадар болгон украин аскер кызматкерлери Донецк Элдик Республикасынын (ДЭР) Новоазовск шаарындагы медициналык мекемеге жеткирилгенин белгиледи.

Украин тарап 16-майда 53 оор жарадар болгон украин аскери Азовстальдан көзөмөлдөгөн аймакка, Новоазовск шаарына эвакуацияланганын, ал эми 211 украин жоокери гуманитардык коридор аркылуу Еленовкага (ДЭР) жеткирилгенин билдирди.

21-апрелде Орусиянын президенти Владимир Путин коргоо министри Сергей Шойгу менен жолугушууда Азовстальга кол салууну туура эмес деп атап, аны жокко чыгарууну буйруп жана аскерлерге бул өнөр жай аймагын "чымын учпаш үчүн" тосууну тапшырган.

4-майда Шойгу селектордук жыйында украин аскер тобунун калдыктары Азовстальдын бүт периметри боюнча коопсуз тосулганын жана Орусиянын Куралдуу күчтөрү аларды куралын таштоого көндүрүү аракетин улантып жатканын айтты.

4-майда орус мамлекет башчысынын басма сөз катчысы Дмитрий Песков орус аскерлери АЭСтин аймагына чабуул жасабастан, ал жерде блокадага алынган согушкерлердин ок атуу пункттарына жетүү аракетин басышууда деп билдирди.

Булак: NazarNews.kg