Бүгүн Өзгөн районунда Кемпир-Абад суу сактагычынын айланасындагы кырдаал боюнча курултай өтүп жатат.

Уюштуруучулар сөздү президенттин Ош облусундагы ыйгарым укуктуу өкүлү Зиядин Жамалдиновго беришти.

Ал кыргыз-өзбек чек арасы боюнча сүйлөшүүлөр бир жылдан ашык убакыттан бери жүрүп жатканын билдирди. Кошумчалай кетсек, анын айтымында, патриот дегендер эмне үчүн Кемпир-Абад суу сактагычынын маселесин эми гана көтөрүүнү чечкени түшүнүксүз.

«Менимче, бүгүн өлкөнүн бардык аймактарынан эл чогулуп, аксакалдар, патриоттор келишти. Бирок Кемпир-Абад суу сактагычынын айланасындагы кырдаалдан пайдаланбай эртерээк чогулушса болмок. Алар Ош облусунун көйгөйлөрүн айтып, чече алышмак. Жаңы өкмөт чек ара маселелерин чечүүгө убада берди», - деди Зиядин Жамалдинов.

Жергиликтүү тургундар аткаминерге сөзүн улантууга мүмкүндүк беришкен жок. Натыйжада Зиядин Жамалдинов сахнадан кетүүгө аргасыз болду.

Буга чейин Улуттук коопсуздук боюнча мамлекеттик комитеттин төрагасы Камчыбек Ташиев жалпысынан Кемпир-Абад суу сактагычынын акваториясы Кыргызстанга 19 миң гектардан ашык, Өзбекстанга 4 миң 485 гектар жер калганын, бирок эки өлкө биргелешип башкараарын билдирген.

Кемпир-Абад суу сактагычы (Өзбекстанда Анжиян деп аталат) Кыргызстандын Ош жана Жалал-Абад облустары менен Өзбекстандын Анжиян облусунун кошулган жеринде жайгашкан. Ал 1983-жылы Кыргыз Республикасынын аймагында курулган.

1973-жылы Өзбекстан компенсация катары Кыргызстанга 4100 гектар жер берген.

Кемпир-Абадга Тар, Кара-Кулжа, Кара-Дарыя дарыялары куят. Суу сактагыч Кыргызстанга тиешелүү. Анын аянты 4400 гектарды түзөт. Максималдуу толтуруу көлөмү 1,9 куб километрди түзөт. Кезинде Өзбекстанга ижарага берилген. Фергана каналынын суулары Кемпир-Абад суу сактагычынан башталып, Кыргыз Республикасынын Араван району аркылуу Өзбекстан Республикасына кирет.

Булак: NazarNews.kg