Жалал-Абад облусунун Манас шаарында «Кыргыз Республикасынын тоолуу региондорунда «Жашыл Мурас» кампаниясын ишке ашыруу» темасында симпозиум болуп өттү. Иш-чара 2023–2027-жылдар мезгили Тоолуу региондорду өнүктүрүү боюнча иш-аракеттердин беш жылдыгынын алкагында өттү. 

Иш-чара Кыргыз Республикасынын Президентинин тоо күн тартиби боюнча атайын өкүлү Динара Кемелова, Токой сектору боюнча Азия кызматташтык уюмунун (AFоCO), БУУнун Азык-түлүк жана айыл чарба уюмунун (ФАО) Кыргыз Республикасындагы өкүлчүлүгүнүн, ошондой эле Кыргыз Республикасынын Президентинин Жалал-Абад облусундагы ыйгарым укуктуу өкүлчүлүгүнүн колдоосу менен уюштурулду.

Иш-чарага Президенттик Администрациянын, тиешелүү министрликтер менен ведомстволордун, жергиликтүү мамлекеттик администрациялардын жана ЖӨБ органдарынын, ошондой эле эл аралык уюмдардын, финансы институттарынын жана дипломатиялык корпустун өкүлдөрү катышты.

Симпозиум тоолуу региондорду туруктуу өнүктүрүүнүн артыкчылыктарын талкуулоо жана токойлорду калыбына келтирүү, деградацияланган жерлерди калыбына келтирүү, чөлдөшүүгө жол бербөө үчүн аймактарды жашылдандыруу жана агротокой чарбасын өнүктүрүү боюнча демилгелерди илгерилетүү, ошондой эле аталган аспектилер боюнча тажрыйба алмашуу үчүн аянтча болуп калды. 

Токойлорду жана деградацияланган жайыттарды калыбына келтирүү, төмөн көмүртектүү экономиканын алкагында долбоорлорду илгерилетүү боюнча чаралар талкууланды. Эл аралык өнөктөштөр менен кызматташтыкты кеңейтүүгө, инвестицияларды тартууга жана мамлекеттик органдардын, эл аралык уюмдардын жана финансы институттарынын аракеттерин координациялоого өзгөчө басым жасалды.
 Ошондой эле, жашылдандыруу боюнча долбоорлорду ишке ашыруунун практикалык аспектилерине, анын ичинде отургузууларды илимий негиздөөгө, топуракты талдоого, дарактардын түрлөрүн тандоого жана көчөттөрдүн тамыр алышын жана сугарууну камсыздоого олуттуу көңүл бурулду.

Жергиликтүү деңгээлде мындай практиканы кеңейтүү мүмкүнчүлүгүн көрсөткөн фермердик демилгелердин ийгиликтүү мисалдары өзгөчө кызыгууну жаратты.

 Симпозиум конструктивдүү талкуу жана практикалык сунуштар менен аяктап, бул жаратылышты коргоо демилгелерин ишке ашыруу жана тоолуу аймактарды өнүктүрүүнүн туруктуу натыйжалары үчүн министрликтердин жана ведомстволордун, жергиликтүү бийлик органдарынын, эл аралык уюмдардын жана жергиликтүү жамааттардын ишин координациялоонун маанилүүлүгүн баса белгиледи.