Жалал-Абадда окутуучулардын спартакиадасы аяктады

Журналист: NAZARNEWS

30.01.2018, 0:49

17998

коом

Жалал-Абад шаарындагы Эл аралык университеттин (ЭАУ) профессор-окутуучулар курамы жана кызматкерлери арасында өткөрүлгөн спартакиада ийгиликтүү аяктап, жеңүүчүлөр ректорат тарабынан алкоолорго татыды. Бул тууралуу ЭАУнун Кесиптик багыт берүү жана коомчулук менен байланыштар кызматы билдирди.

Спартакиадага окуу жайдын структуралык бөлүмдөрүнөн 6 команда катышып, волейбол, баскетбол, стол тенниси, чатыраш, комбинацияланган эстафета, гиря көтөрүү, бильярд, аркан тартышуу боюнча мелдештер абдан кызуу өттү. Оюнчулар да, күйөрмандар да спорт залдан чыкпай, эч бир оюнду өткөрбөй, спорт майрамын көңүлдөгүдөй өткөрүштү. Беш күндүк спартакиада оюндарында ЭАУнун агай-эжекелери спорттук оюндарда черин жазып, командалык оюндарда жамааттык ынтымагын чыңдашты.

Спартакиаданын соңунда жыйынтыктар чыгарылып, мыкты командалар, мыкты оюнчулар, мыкты күйөрмандар кубоктор, дипломдор, грамоталар, акчалай сыйлыктар менен сыйланышты. Сыйлыктарды тапрышып жатып ЭАУнун ректору, экономикал илимдеринин доктору, профессор Абдилбает Мамасыдыков окутуучулар курамын сергек жашоого үгүттөп, оюндарга активдүү катышкан жетекчилерди, агай-эжекелерди жана кызматкерлерди өзгөчө белгиледи.

Булак: NazarNews.kg