VI чакырылыштын депутаттары милдетин ашыгы менен аткарып тарыхый парламент аталып калды. Бул тууралуу министрлер кабинетинин төрагасы Акылбек Жапаров билдирди.

Ал бүгүн Жогорку Кеңешке келип, мөөнөтү бүтүп кетип жаткан депутаттарга ыраазычылыгын билдирип, алардын жасаган иштерине баа берди.

"Урматтуу менин асыл кесиптештерим, сиздер менен акыркы эки айга чейин алты жыл бирге ушул залда ысыгына күйүп, суугуна тоңуп иштедик. Президенттин, министрлер кабинетинин атынан сиздерге ыраазычылык билдиребиз. Урматтуу президент Садыр Нургожоевич "ЖКнын 6-чакырылышы тарыхый парламент болду" деген жогорку баасын берген. Мен да ошол сөзгө толук кошулам жана кубаттайм. 6-чакырылыш бийликти тынчтык жолу менен өткөрүүгө өбөлгө болду", — деди Жапаров.

Ошондой эле ал Кыргызстандын тарыхында 5-чакырылыш гана Конституциялык мөөнөтүн так аткарганын, калгандары мөөнөтүнөн мурда тарап кетип турганын белгиледи. Ал эми 6-чакырылыш бир жылга ашыгы менен иштегенине токтолду.

"Дегеле Жогорку Кеңеш боюнча менин ойлорум абдан бийик. Улуттун башкы калысы парламент деп билемин. Бул чакырылыш өз милдетин ашыгы менен аткарды деп таанууга болот. Эң башкысы 6-чакырылыш өлкөбүздүн өнүгүшү үчүн туруктуулукту, мамлекеттик башкарууда укуктук талааны сактап калууда аткарган ролу абдан чоң болду деп баалайм. Былтыр биздин чакырылыш 30 жылдан берки топтолгон көйгөйлөрдүн астында жаралган толкундан, мамлекетибиз бараткан кайыктын чайпалып, түбү жок деңизге чөгүп кетишинен Кыргызстаныбызды сактап калды", — деди министрлер кабинетинин төрагасы.

Соңунда ал депутаттардын колдоосун ар дайым күтөрүн айтып, келе жаткан жаңы жылы менен куттуктап, ден соолук каалады. Аны менен катар "бетегеге бел бололу, беги бар бекем эл бололу" деп жаңы Кыргызстанды курууга бел байлаганын айтып өттү.

Булак: NazarNews.kg