Москва Кара деңиздеги украин портторун блокададан бошотуп, Украинадан дан экспорттоону жандандырган күндө да, АКШ Орусияга киргизген санкцияларды албайт. Бул тууралуу Politico басылмасы америкалык аткаминерлердин бирине шилтеме кылып кабарлады.

Басылманын маектеши Орусиянын бул темадагы билдирүүсүн "опузалоо дипломатиясы" деп атаган.

АКШ президентинин администрациясы жана америкалык мыйзам чыгаруучулар Орусиянын азык-түлүк каатчылыгын жеңүүгө жардам берүүгө даяр экендиги тууралуу билдирүүсүнө шектенүү менен кароодо. Маселен, Айдахо штатынан сенатор Жеймс Риш Москванын дан экспорту маселесин чечүү үчүн санкцияларды алуу талабын "шантаж" деп атады.

Вашингтон Кара деңиз аркылуу дан экспорттоону жандандыруу боюнча БУУнун жана Түркиянын Орусия менен сүйлөшүүлөрүнө өзгөчө көңүл бөлүүдө. Басылманын өз булагы Кошмо Штаттар Москвага каршы киргизилген экономикалык санкцияларды жумшартуу үчүн кандайдыр бир макулдашууларга барбай турганын белгилеген.

Politico басылмасынын БУУда иштеген маектешинин айтымында, санкцияны алууга дан экспортун аралаштыруу Москва менен болгон ансыз да "морт" сүйлөшүү жараянын ого бетер татаалдаштырат.

Кремль азык-түлүк жеткирүүдөгү кыйынчылыктар БУУнун эсеби боюнча миллиондогон адамды ачкачылыкка кептей турганын билдирүүдө. Москва муну батыш өлкөлөрүнүн жаңылыш экономикалык жана каржы саясатынын кесепети деп эсептейт.

БУУ украин портторунан дан алып чыгып кетүүгө Орусия кедерги тийгизип жатканын билдирүүдө. Орусиянын президенти Владимир Путин "Россия-24" телеканалына берген интервьюсунда бул билдирүүнү "калп" деп атаган. Ал Киев фарватерди минадан тазаласа, дан жүктөлгөн украин кемелеринин Кара Деңиз портторунан өтүшүнө кепилдик берерин айткан. Буга чейин Путин Италиянын премьер-министри Марио Драги менен телефондук сүйлөшүү учурунда Батыш Украинадагы согушка байланыштуу киргизилген санкцияларды алып таштаса, Орусия дүйнөлүк азык-түлүк каатчылыгын жеңүүгө үлүшүн кошууга даяр экенин айткан.

Орусия менен Украина дан өндүрүү боюнча дүйнөдөгү алдыңкы бешилтикке кирет. Орус армиясы Украинага кол салгандан бери азык-түлүк баасы кескин жогорулап кетти.

Эске салсак, Орусия Украинага каршы согушту 24-февралда баштаган. Путин анын максаты "сегиз жылдан бери Киев режиминин басмырлоосуна, геноцидине кабылып келгендерди коргоо" жана бул үчүн "Украинаны демилитаризация жана денацификация" жасап жана Донбасстагы "жай жашоочулардын канына забын болгондорду" аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Үч айдан ашкан согушта эки тараптан тең аскерлер жана жайкын тургундардан миңдеген курмандыктар катталды. 

Булак: NazarNews.kg