Жогорку Кеңештин депутаты Жаныбек Абиров Бишкектеги ресторандардын биринде күзөт кызматынын өкүлүнүн бети башын жарып салган окуядан соң, бул жоругуна өкүнөрүн билдирип, жабырлануучудан жана кыргыз элинен, шайлоочуларынан кечирим сурап, мандатынан өз каалоосу менен баш тартты. 

Өзүнүн кемчилигин түшүнгөн азамат экен. Минтип кемчилигин билип, мандатын тапшырган же кызматынан баш тарткан окуя Кыргызстандын тарыхында чындап боло элек болчу. 

Төмөндө Жаныбек Абировдун өзүнүн кайрылуусун өзгөртүүсүз беребиз: 

– Урматтуу кыргызстандыктар! 
Менин катышуумдагы акыркы болуп өткөн окуя коомчулук арасында кызуу талкуу жаратты. Окуянын олуттуулугун толук түшүнүп, жоопкерчиликти сезип жаткандыгымды жана Кыргыз Республикасынын мыйзамдарына ылайык жоопкерчилик тартууга даяр экендигимди дагы бир жолу баса белгилейм.

Ушуга байланыштуу, мен, окуяны талдап, терең ой жүгүртүп, өз каалоом менен Кыргыз Республикасынын Жогорку Кеңешинин депутатынын мандатын тапшыруу чечимин кабыл алдым.

Албетте, бул чечимди кабыл алуу оңойго турган жок, анткени борбор калаабыздын Ленин районундагы 11 813 шайлоочу мага ишенип, алардын өлкө парламентиндеги өкүлү болуу укугун берди эле.

Тилекке каршы, болуп өткөн окуядан кийин, Кыргыз Республикасынын Жогорку Кеңешинин депутатынын кызматын мындан ары аркалоого моралдык укугум жок деп эсептейм.

Жалпыңыздардын алдыңыздарда, Аргенден жана анын үй-бүлөсүнөн, жакындарынан, ошондой эле мага ишеним көрсөткөн шайлоочуларымдан жана командамдан чын жүрөктөн кечирим сураймын.

Урматтоо менен,
Жаныбек Абиров

Булак: NazarNews.kg