Мамэкотехинспекцияга Жолдошбек Жунушев аттуу аты-жыты белгисиз эргул келер
замат чуу жаралды. Тармактын басма сөз катчысы Анара Мамбеталиева (айтылуу Эркин Мамбеталиевдин карындашы) системадагы коррупцияны айтып, жетекчи катары Жунушевге кирсе, береги эргул жемкорлукка чара көргөндүн ордуна, татыннактай кыздын өзүн алып койгону неси?

Мындай жетекчинин түпкүлүгүнө кызыксаңар аягы барып түбүң түшкүр баягы алкомагнат Шаки дегенге такалары маалым болду. Убагында бу эргул кыргызга кетпес кегиндей иш кылып кеткен Данияр Үсөновдун кол баласы болуп, ал канкор качканы Шакинин колтугуна кире качып, «Аюу курулушун» жетектегени каңкууланууда. Ал ортодо Бишкек шаардык кеңешине депутат боло калып, андан кыйраткан иши жок болсо дагы аттап өтүп, кыска аралыкка «Кыргызкөмүргө» да жетекчи боло калган. Жумгалдыктар Данияр Үсөнов менен иштеген ниети кара немени «Кыргызкөмүргө» жолотпой коюшканда гаптин майын чыгара иштеп жаткан Канат Муратбековду тээп, ордуна келгени бар. Өмүр бою салыкта, курулуш бизнесте иштеген неме Экотехинспекцияга кантип келип калды?

Алкомагнат Шакиге артын такаган кол балдары кайда барбасын артынан чуу жаратышканды качан токтотушат? Буларды «кой-ай» деп колго чаап койчу жан барбы? Тармактагы коррупциялык иштерди ачкандын ордуна иштеп аткан кызды жумуштан кетиргени президентгин саясатына каршы чыкканыбы? Минтип адилетсиз иштерге баш сала берсе, бул эргулду жакында айтылуу Эркин Мам-беталиев мойнун бурап, кабыргаларын матап койбойбу?..

ИйгиликБолсунбев

Булак: “Азия Ньюс”