Кечээ күнү белгилүү болгондой, Жогорку кеңештин маалымат кызматынын мурдагы башчысы Ибраим Нуракун уулу Борбор Азиянын медиафондун түзүп, аны башкарууга киришиптир. Бул фонд Кыргызстандын гана эмес, бүткүл Борбор Азиянын журналисттерин бириктирип, пикир жана тажрыйба алмашуу ордосуна айланмакчы.

Кыргызстанда көптөгөн медиа-уюм бар – Журналисттердин эки союзу, «Журналисттер» деп аталган коомдук бирикме, Медиа-полиси институту, Маалымат каражаттарын колдоо борбору, «Интерньюстун» өкүлчүлүгү, Медиа-өнүгүү борбору, Арыздар боюнча комиссия, Бишкек менен башка шаарларда ресурстук борборлор иштейт жана башка.

Мүмкүн, ушунча уюм болгондуктан, сөз эркиндиги дайым коом көңүлүнүн чордонунда жана ал дайым корголууда? Эгерде бир эмес, мамлекеттик да, жеке менчик дагы бир нече илимдер академиясы болсо, илим дагы балким көтөрүлмөк? Билим берүү, спорт же өнөр тармагында дагы ар башка уюмдар болгондуктан, өнөрүбүз ошол себептен көөнөрбөйт?