Гвадалахара шаарында жана Мексиканын бир катар аймактарында аскердик операциянын жүрүшүндө кылмыштуу топтун лидери жок кылынгандан кийин коопсуздук кырдаалы курчуду. Окуядан соң куралдуу кагылышуулар, өрт коюу фактылары жана автоунаа жолдорун тосуу учурлары катталды. Расмий маалыматтарга ылайык, өлкө боюнча ондогон адамдар каза болгон. Бул тууралуу arabnews жазып чыкты. 

Учурда Гвадалахара жай айларында өтө турган футбол боюнча дүйнө чемпионатынын төрт беттешин өткөрүүгө даярдык көрүүдө. Турнир Мексика тарабынан АКШ жана Канада менен биргеликте уюштурулат.

Халиско штатынын бийлиги коомдук коопсуздукту камсыз кылуу максатында кошумча чараларды киргизди. Алардын алкагында дрондор, дрондорго каршы техникалык каражаттар жана жасалма интеллектке негизделген видеокөзөмөл системалары колдонулат.

Ошол эле учурда аймакта дайынсыз жоголгондор маселеси курч бойдон калууда. Расмий статистикага ылайык, штатта 12 миңден ашуун адам дайынсыз деп эсептелет. Укук коргоо органдары тарабынан издөө иштери улантылууда.

Коопсуздук жагдайына байланыштуу айрым билим берүү мекемелеринин иши убактылуу токтотулуп, коомдук иш-чараларга чектөөлөр киргизилди. Тиешелүү мамлекеттик органдар кырдаалды туруктуу көзөмөлдөп, коомдук тартипти камсыз кылуу боюнча иш алып барууда.

Экономикалык сектордун айрым өкүлдөрү тартипсиздиктердин натыйжасында чыгымдар болгонун билдиришкен.

Мамлекеттик органдар жарандарды сабырдуулукка чакырып, коопсуздук талаптарын так сактоону өтүнөт.