Москва шаардык соту "атасын өлтүрдү" деп шек саналып жаткан бир тууган Хачатуряндарды камакта калтырды. Кыздардын адвокаты кылмышка шектүүлөрдү үй камагына которууну өтүнгөн.

Жараяндын жүрүшүндө прокуратуранын өкүлү кылмыш ишине каза болгон Михаил Хачатуряндын кыздарына жыныстык ыдык көрсөткөнү тууралуу жаңы маалыматтар киргизилгенин билдирди. Эже-сиңдилердин адвокаты Алексей Паршиндин айтымында, маркум Хачатуряндын бул кылыгын тергөө азырынча "аморалдык аракет" деп баалап жатат.

Өз атасын өлтүрүп коомчулукту дүрбөлөңгө салган эже-сиңдилер зордукчул атасы аларга күн көрсөтпөйт ур токмокко алгандарын сүрөткө тартып алып турушкан. Канча күндөн бери коомчулук алардын тагдырына кабатыр болуп соттун чечимин күтүп жаткан учур. Тергөө иштеринде улам жаңы ачылган фактылар коомчулукту гана эмес тажрыйбалуу тергөөчүлөрдү дагы таңгалдырып жатат. 

Укук коргоочулар СИЗОдо отурушкан бир тууган эже-сиңди хачатуряндардын абалынан кабар алып турушат. Коомдук байкоочу кеңештин мүчөсү Иван Мельников зордукчул атасын бычак сайып өлтүргөн үч бир тууган эже-сиңдилердин абактагы шарттары тууралуу айтып беришти.

“Алар карантинде кармалып турушат. Үчөө үч башка камерада. Алар бири-бири тууралуу аябай кабатырланышууда. Кыздардын бирөө мага эң кыйыны ажырашуу болуп жатканын айтты – алар өмүр бою бирге жашашчу, эми болсо бөлүп салышты” – дейт укук коргоочу.

Мельниковдун айтымында, кыздардын кичүүсү жашы жете электердин камерасында отурат. Бул камера өзгөчө шарттары менен айырмаланат: анда муздаткыч, сыналгы, стол оюндары жана китептер бар. Улуусу жалгыз, а ортончусу – дагы эки камералаштары менен жайгашкан. “Алардын абдан бүлүнгөнү көрүнүп турат, ыйлашкан. Алар кабатырланууда, кыжалат болушууда” – дейт ал.

Мельников кыздар СИЗОго кийимдерин алып келүүнү суранышканын айтты. “Биз тергөө изоляторунун жетекчилигине алардын кийим-кечесин берүүгө жардам берүүгө көрсөтмө бердик, ошондой эле кыздардын коопсуздугун камсыздоону жана буга дыкат көңүл бурууну сурандык” – деп билдирди укук коргоочу.

Эске салсак, 27-июлда Алтуфьев шоссесиндеги үйдөн Хачатуряндын мойнуна жана көкүрөгүнө миздүү нерседен жараланган жансыз денеси табылган. Адам өлтүрүүгө шектелип анын үч кызы кармалып, алар күнөөсүн мойнун алышкан. Укук коргоочулардын айтымында, атасы кыздарын сабачу, мектепке жөнөтчү эмес жана кул катары пайдаланчу. 2-августта сот эже-сиңди кыздарды 28-сентябрга чейин камакка алган.

Булак: NazarNews.kg