Айыл чарба министри Аскарбек Жаныбеков күздүк түшүмдү көбөйтүү үчүн дыйкандардын кооперативин түзүү керектигин айтты. Чиновник жалгыз дыйкан үчүн күздө себилген түшүмдү талаада кайтаруу, көптөгөн түйшүктөрүн көтөрүү оор болорун белгиледи.

"Биз былтыр 180 миң гектар жерге күздүк буудай себебиз деп болжогонбуз, бирок 132 миң гектар жерге себилип калган. Жалпысынан жазында буудай себилген аянт 233 миң гектарга жетти. Бул жылы дагы 180 миң гектар жерге күздүк буудай себилет деп божомолдогонбуз. Бүгүнкү күндө 129 гектар жерге күздүк буудай айдалды. Күздүк сеппегенге болбойт, биринчиден, бул түшүмдүүлүк, экинчиден, жазында боло турган айыл чарба иштерине жеңилдик, үчүнчүдөн, азыктык буудайдын эң сапаттуусу — күздүк буудайдын түшүмү", — деди Жаныбеков.

Ал министрлик тарабынан дыйкан фермалардын башын бириктирип, кооперативдерди түзүп, ирилештирүү аракеттери жүрүп жаткандыгына токтолду.

"Күздүк түшүмдү көбөйтүү үчүн кооперативдерди түзүү зарыл. Кыргызстан боюнча мамлекеттик фонддо турган айдоо аянттардын дээрлик 50 пайызын министрликтин жер-жерлердеги өкүлчүлүктөрү комиссия аркылуу асыл тукум мал чарбаларына, үрөн чарбаларга келишим менен убактылуу бергенге аракеттерди көрүп жатышат. Жобого ылайык, кооперативдерге мамлекеттик фонддун карамагындагы жерлерди келе жаткан жылдын 1-январынан тартып бере баштайбыз. Ирилешкен чарба биримдиктерине жер берүү менен кооперативдерди көбөйтө алабыз", — деди министр.

Булак: NazarNews.kg