Султанбай Айжигитовдун депутат катары парламент имаратына кирип-чыгуу мүмкүнчүлүгү чектелди, деп билдирди Жогорку Кеңештин басма сөз кызматы 2-апрелде.

Депутат бүгүн парламенттин имаратына кире албай калган.

Жогорку Кеңештин расмий маалыматында: «Шайлоо жана референдум өткөрүү боюнча борбордук комиссиянын 2025-жылдын 28-мартындагы жыйынында партиялык тизме менен "Ыйман Нуру" саясий партиясынан шайланган депутат Султанбай Айжигитовдун ыйгарым укуктарын мөөнөтүнөн мурда токтотуу тууралуу чечим кабыл алынган. Бул боюнча БШКнын тиешелүү токтому Жогорку Кеңешке келип түштү. Ыйгарым укуктары токтотулгандыгына байланыштуу Султанбай Айжигитовдун депутат катары парламент имаратына кирип-чыгуу мүмкүнчүлүгү тиешелүү эрежеге ылайык чектелди», - деп айтылат.

Жогорку Кеңештин имаратына депутаттар жана аппараттын кызматкерлери электрондук каттоо менен киришет. Ал эми жарандарга атайын берилген уруксат кагазы менен парламент имаратына кирүү мүмкүнчүлүгү түзүлгөн.

С.Айжигитов март айынын башында кыргыз-тажик чек арасы боюнча келишимдин айрым пункттарына каршы чыккан. Ошол эле күнү «Ыйман Нуру» фракциясы Айжигитов чек ара боюнча өз пикирин фракция менен макулдашпаганын айтып, анын курамынан чыгарган.

19-мартта парламенттин жыйынында УКМКнын башчысы Камчыбек Ташиев депутат эмне үчүн чек ара келишиминин айрым пункттарына каршы чыгып жатканын түшүнүү үчүн Айжигитов боюнча досье чогултканын билдирген. Ташиевдин айтымында, досьенин материалдарынан Айжигитов БШКдан соттуулугу тууралуу маалыматты жашыргандыгы аныкталган. Бул депутаттык мандатын жокко чыгарууга негиз болот.

28-мартта БШК С.Айжигитовду Жогорку Кеңештин депутатына талапкерлердин тизмесинен чыгарган. Муну менен мандатынан ажыратылды.