АКШ президенти Дональд Трамп Ирандын Харг аралындагы мунай инфраструктурасын басып алуу мүмкүнчүлүгүн караштырып жатат.

Axios басылмасынын маалыматына ылайык, америкалык расмий булактар Вашингтондогу администрация Ирандын негизги мунай сактоочу жайлары жайгашкан Харг аралын көзөмөлгө алуу мүмкүнчүлүгүн изилдеп жатканын билдиришкен.

Маалыматка караганда, мындай кадамды ишке ашыруу үчүн АКШ кургактагы аскердик операция жүргүзүшү мүмкүн. Бул вариант Перс булуңунда танкерлердин жүрүшү тоскоолдукка учураса колдонулушу ыктымал.

Вашингтон Харг аралындагы мунай инфраструктурасын көзөмөлдөө Тегеранды мунай кирешесинин олуттуу бөлүгүнөн ажыратат деп эсептейт. Бирок ошол эле учурда АКШ Ирандын аймактагы мунай объектилерине жооп кайтаруучу сокку уруусу мүмкүн экенине да тынчсызданууда.

Булактардын маалыматына ылайык, азырынча акыркы чечим кабыл алына элек. Учурда мүмкүн болгон тобокелчиликтер жана пайдасы талданып жатат.

Буга чейин Ирандын Ислам революциясынын сакчылар корпусунун деңиз күчтөрүнүн кол башчысы, контр-адмирал Алиреза Тангсири АКШ же Израиль Харг аралына дагы сокку урса, бул дүйнөлүк мунай рыногунда олуттуу көйгөйлөрдү жаратышы мүмкүн экенин эскерткен.

Ал эми Дональд Трамп 13-мартта АКШ күчтөрү аралдагы аскердик объектилерге күчтүү сокку урганын, бирок мунай инфраструктурасын атайын жок кылбаганын билдирген. Ошол эле учурда ал эгер Иран же башка күчтөр Ормуз кысыгы аркылуу эркин кеме жүрүшүнө тоскоолдук кылса, бул чечим өзгөрүшү мүмкүн экенин айткан.