АКШнын Куралдуу күчтөрүнүн Борбордук командачылыгы (CENTCOM) Иранга каршы операция башталгандан бери америкалык аскерлер арасындагы алгачкы жоготуулар тууралуу билдирди.

Командачылыктын маалыматына ылайык, чыгыш убактысы боюнча 1-мартка карата “Эпикалык каар” операциясынын жүрүшүндө үч аскер кызматкери каза болуп, дагы бешөө оор жаракат алган. Бир нече адам жеңил жаракат жана контузия алып, кайрадан кызматка кайтууда. Жаңы билдирүү операция башталгандан берки АКШ тараптан болгон жоготууларды алгачкы ырастоо болуп калды.

“Эпикалык каар” операциясы 28-февралда АКШ президенти Дональд Трамптын буйругу менен башталып, Израилдин “Арстандын күркүрөөсү” операциясы менен биргеликте жүргүзүлүүдө. Соккулар Ирандын аскердик объектилерине, Ислам революциясынын сакчылар корпусунун командачылык пункттарына жана ракеталык программасынын инфраструктурасына жасалган. Айрыкча Тегеран шаары, анын ичинде президенттик комплекс жана жогорку кызмат адамдарынын резиденциялары соккуга кабылганы маалымдалган.

Жооп иретинде Иран Израилге жана АКШнын Бахрейн, Кувейт, Катар, БАЭ, Иордания жана Сауд Арабиясындагы аскердик базаларына ракета жана дрондор менен сокку урган.

Ирандын Кызыл Жарым Ай коомунун маалыматына ылайык, согуштук аракеттердин биринчи күнүндө кеминде 201 адам каза болуп, дагы 747 киши жаракат алган. Маалыматтарга караганда, соккулардын бири Минаб шаарындагы кыздар үчүн башталгыч мектепке тийген, расмий маалымат боюнча ал жерде каза болгондордун саны 140тан ашкан.