АКШ Сенаты 2026-жылга карата АКШнын Коргоо министрлигинин (Пентагон) саясатын жана каржылоолорун белгилеген 901 миллиард долларлык Улуттук коргонууга уруксат берүү мыйзамын (NDAA) бекитти.

Сенат шаршемби күнү мыйзам долбоорун 77 макул 20 каршы добушу менен бекитип, ушул айдын башында Өкүлдөр палатасынан өткөн долбоорду кабыл алды.

Мыйзам долбоору эми кол коюлушу үчүн президент Дональд Трампка жөнөтүлөт.

3086 беттен турган мыйзам долбоорунун негизги жоболоруна Украинанын коопсуздук жардам демилгесинин алкагында Украина үчүн 800 миллион доллар (кийинки эки жылдын ар бирине 400 миллион доллар) жана Башар Асаддын режими учурунда Сирияга киргизилген Цезарь санкцияларын алып салуу кирет.

Мыйзам долбоорунда ошондой эле Израилге 600 миллион доллар бөлүнөт, анын ичинде Темир купол системасы сыяктуу биргелешкен ракетадан коргонуу демилгелери үчүн каражаттар да бар.

Кытайдан келе турган ыктымалдуу коркунучтарды да эске алган мыйзам долбоору Индия-Тынч океан миссияларынын ийгилигин камсыз кылуу боюнча чараларды камтууда. Ошондой эле Тайвань коопсуздук кызматташтыгы демилгеси үчүн 1 миллиард долларлык бюджет каралган.

NDAA АКШнын Коргоо министрлигине Чыгыш Европадагы АКШнын аскердик катышуусунун чыгымдарын жабуу үчүн НАТО өнөктөштөрүнөн каражат чогултууга уруксат берет. Ошондой эле, АКШнын Европа командачылыгынын (EUCOM) командиринен АКШ менен НАТОнун Орусияга каршы салыштырмалуу аскердик артыкчылыгын кантип сактаганына байланыштуу жыл сайын отчет даярдоосун талап кылат.

Андан тышкары Пентагонго Европадагы аскердик катышуусун 76 000ден төмөн түшүрүүдөн мурун АКШнын коопсуздугуна тийгизген таасирин баалоону милдеттендирет.