Орусиянын президенти Владимир Путиндин идеяларынын популярдуулугу Батыш өлкөлөрүнүн лидерлеринин жана калкынын арасында өсүүдө. Бул тууралуу The Washington Post гезити жазган макаласында айтылат.

Америкалык басылманын айтымында, сентябрдын аягында Владимир Путин «АКШдан баштап Европанын көпчүлүк өлкөлөрүнө чейин демократиялык өлкөлөрдө тааныш жана көпчүлүк үчүн жагымдуу угулчу» сөз сүйлөдү.

АКШнын Аскер-деңиз колледжинин улуттук коопсуздук боюнча профессору Николас Гвоздев басылмага билдиргендей, бул тенденция демократиялык процесс эффективдүү, харизматикалык лидерлерди чыгара албайт деген дүйнөнүн нааразычылыгын чагылдырат.

Ошол эле учурда, деп баса белгиледи ал, бул бир гана саясатчылар жөнүндө эмес, технократтардын наркынын өсүшүнө ишарат кылды. Ал мисал катары америкалык ишкер Илон Маскты келтирип, аны «көйгөйлөрдү чечип, өз ишин аткаргандардын» бири катары атады.

Эске салсак, буга чейин Мамлекеттик Думанын депутаты Олег Морозов Орусия президенти Владимир Путин батыш өлкөлөрү үчүн эбак эле максат болуп келгенин, бирок алар үчүн бул максат ишке ашпай турганын билдирген. «Ошондуктан алар өзөктүк риторикага барышат, аны өздөрү бизге кысым көрсөтүүнүн куралы кылып алышты», - деп белгиледи парламентарий.

Булак: NazarNews.kg