Бүгүн, 15-октябрда КР Президенти Сооронбай Жээнбековдун отставкага кеткени кыргызстандыктарды гана эмес дүйнө жүзүн таң калтырды. Айрымдар бул көрүнүш туура кадам десе, айрым президенттин тарапташтары тишин кайратып жаткан учур. Ал тургай генерал Феликс Кулов Жээнбековдун кадамына таң калып, Ала-Арчадагы президент менен жолугушуусун социалдык баракчасына ачык жазып чыкты.

--Президент менен жолугушууда бир топ коомдук ишмерлер менен бирге мен дагы катыштым. Жолугушуу күндүн биринчи жарымында аяктады. Кызматтан кетүү тууралуу сөз болгон жок. Жыйын бүткөндөн кийин Садыр Жапаров менен Камчы Ташиев резиденцияга келишти. Мына сага, чоң жаңылык: Президент күтүүсүздөн оюн өзгөртүп, күтүүсүздөн кызматтан кетти. Бул жерде бир гана тыянак болушу мүмкүн: Айрым күчтөр (эртеби-кечпи кандай күчтөр экени белгилүү болот) бийликти күч менен басып алуу чечимин кабыл алышты жана Президентке тандоо берилди, өз ыктыяры менен кызматтан кетүү же чыныгы согуш, эч кандай цитаталар жок. Болбосо, алар өлкө үчүн ушундай кризистик учурда өз кызматтарын жөн эле таштап кетишпейт болчу... Азыр парламентти таркатуу талабы коюлуп жатат. Андан кийин өлкөдөгү бардык бийлик премьер-министрдин колуна өтөт. Кызык, андан кийин эмне болушу керек, кимдир бирөөнүн жазган сценарийи, ачыкка чыгып калды окшойт? – деп жазган Феликс Кулов.

Ал эми Борбордук шайлоо комиссиясынын мурдагы төрагасы Акылбек Сариев журналисттерге президент Сооронбай Жээнбековдун кызматтан кетиши менен VI-чакырылыштагы депутаттардын ыйгарым укуктары жаңы чакырылыштын депутаттары ант берген учурдан тартып бүтөөрүн унутпаш керектигин билдирди.

--“Алардын жаңы чакырылыштын биринчи жыйналышына чейин иштешкени мыйзамдуу. Эгерде алар өзүн-өзү таркатабыз деп жарыялашса, анда укуктук туңгуюк жана коллапс башталат” – деди ал. 

Булак: NazarNews.kg