Алматыда кыргызстандык 29 жаштагы аял балдарынын көзүнчү турникке асынып алган. Бул тууралуу казак маалымат каражаттары жазып чыгышты. 

Маалыматка ылайык, окуя, кечээ, 20-июлда Алматынын Мамыр конушунда болгон. Окуяга күбө болгондордун айтымында, аял коридордогу турникке асынып алган. Бул учурда улуу кызы чоң атасынын үйүндө, ал эми ортончу кызы менен кичүү кызы апасы менен болгон. 

"Мен үчүнчү кабаттан кичинекей кыздын "Жардам бергиле, жардам бергиле! Апам өлдү, апам өлдү!" деп кыйкырганын уктум. Өтүп бара жаткан кызга "Жүр, көрөлү, жалгыз баргандан эмнегедир коркуп жатам" дедим. Аны менен барып турникке асынып алган Айперини көрдүм", - деген маркумдун кошунасы Нургүл Аликпаева.

Жыйынтыгында маркумдун Кыргызстандын жараны экени, ал 29 жашта экени белгилүү болгон. Анын Алматыда жакын туугандары жок. Кошуналарынын айтымында, күйөөсү аялынан 15 жаш улуу. Ал балдарына көңүл бурбай, аялына кол көтөргөн.

Аталган факты боюнча милиция (Өзүн-өзү өлтүрүүгө жеткирүү) беренеси боюнча кылмыш ишин козгоп, бардык жагдайлар тергөөчүлөр тарабынан изилденип жатканы айтылат.

"Тааныштарынын, досторунун, кошуналарынын айтымында, ал маал-маалы менен үй-бүлөлүк зомбулукка кабылып, ур-токмокко алынган. Ал күйөөсүн бир нече жолу ойноштору менен кармап алган. Күйөөсү аны жумалап үйүнөн кууп чыгып койгон учурлар болгон. Маркум кыздарга күйөөсү балдарынын жөлөк пулун алып коюп жатканын айтып арызданган. Күйөөсү ага акча берчү эмес, аял өзүн-өзү багууга аргасыз болчу. Маркум буйрутмаларды алып, тигүүчүлүк менен алектенип, тамак-аш бышырып сатчу", - дейт коомдук ишмер Жибек Аменова.

Булак: NazarNews.kg