“Жыгылсаң нардан жыгыл, буйласын кармай жыгыл” деп “Азаттык” үн алгысынын кабарчысы Али Токтакунов үлкөн адамдарга үлкөн жалаа менен чыгып, атагым алыска жетти деп, “Ата-Мекен” партиясында ат чабышты баштаган.

Ал экс-президент Алмазбек Атамбаевдин колдоосу менен анын атаандаштарына кара көө сүйкөп көнүп калган. 100 миң доллар Атамбаевден алып түбөлүк унутпайм дегени бар. Эми шайлоо алдында “Социал-демократтарды”боктоп үгүт жүргүзүүдө, анын оозун ким тыйат.

Ошол үчүн өзүнүн туулуп өскөн Кара-Кулжа аймагында спонсору Атамбаевди ыштап, принцибинен тайып өйдө-төмөн сүйлөп жаткан аудиосу жарыяланды. Сопоков Саймаити менен жакшы тааныш болгон, ал 2019-жылдын сентябрь айында Стамбулдагы Башкы консулдукка келип, Сопоков менен чай ичип отуруп, Саймаити баягы эле акча боюнча арманын айтып кирет.

Саймаити Өзбекстандагы “Абу –Сахий” базарынын кожоюну Ажыке (Хабибула Абдукадыр) 830 миң доллар карызын бербей жүргөнүн даттанган. Ажыкеден карызын алуу үчүн “Азаттык” үн алгысынын журналисти Али Токтакунов менен сүйлөшүп, ага которулган акчалардын квитанцияларын көрсөтөт.

2019-жылдын февраль-март айларында Али Токтакуновго маалыматтарды даярдоо үчүн кээ бир квитанцияларды берген. Саймаити Ажыке (Хабибула Абдукадыр) менен телефон аркылуу байланышып карыздарын доолап турган. Сопоков 2019-жылдын апрелинде Айэркен Саймаити менен жолугушканда, ал 300 миң долларын алгандыгы тууралуу айткан.

2019-жылдын июнунда Стамбулга 200 миң долларын берип жибергени белгилүү болгон. Ошондон соң Айэркен Саймаити Сопоковго жакында, “Азаттык” үн алгысынын журналисти Али Токтакунов учуп келерин, ага 50 миң доллар бере турганын айткан. Мунун себеби, журналист жалпы маалымат беттеринде Айэркен Саймаитиге карыздарын өндүрүп алууга жардамын бермек, ал эми Айэркен Саймаити бул үчүн ага акча төлөмөк.

Сүйлөшкөн боюнча Айэркен Саймаити Али Токтакуновго 100 миң доллар бермек, 50 миң доллар бергендигинин себеби, калганын карыздар толук колго тийгенден кийин бере турган болгон. 2019-жылдын июль айында “Азаттык” үн алгысынын журналисти Али Токтакунов учуп келип Саимаитиден 50 миң доллар алганы тууралуу Сопоков билдирген.

Сопоковдун айтымында Айеркен Саимаити Хабибула Абдукадырдан 500 миң доллар алган. 2019-жылдын август же сентябрь айларында, Стамбул шаарында экөөнүн жолугушуусу болмок. Ажыке (Хабибула Абдукадыр) Өзбекстандан Стамбулга келип калган акчаларын Айэркен Саймаитиге бермек.

Атамбаевди учурда колдоп жаткан “Социал-демократтар” ичинде Сопоков Эркин мыйзамсыз 200 000 доллар жана 47,6 миллион сомго мүлктөрдү менчиктештирип алганы үчүн соттолгон. Сотто бардыгын мойнуна алган Сопоков Эркин 260 миң сом айып пул төлөп бошотулган. Жегенин доллар менен жешет, төлөгөнүн сом менен төлөшөт.

Сопоков Эркин бир кезде издөөдө жүргөн маркум кытайлык бизнесмен Айэркен Саймантинин машинасы менен жүргөнү такталган. Бул тууралуу өзүнчө сөз болор, бирок консулдун издөөдө жүргөн адамды кармамак түгүл машинасы менен жүргөнүн Сталин билсе атып салмак.

Мурун Шопоковдор эли үчүн өлүмгө даяр эле, эми Сопоковдор акча үчүн өлүмгө даяр. Стамбулдагы Башкы консул Эркин Сопоков жүргөн дипломатиялык номерлүү машина Айэркен Саймаитини өлтүргөн жерден табылган. Сопоков кызматынан алынып, УКМКнын СИЗОсуна камалган.

Азизбек КЕЛДИБЕКОВ, NazarNews.kg