Абактагы ооруканада каза болгон укук коргоочу Азимжан Аскаровдун сөөгү Өзбекстанда жерге берилет. Бул тууралуу "Бир дүйнө-Кыргызстан" укук коргоо уюмунун жетекчиси Төлөкан Исмаилова билдирген.

Исмаилованын айтымында, маркум Азимжан Аскаров каза болуп калсам сөөгүмдү Өзбекстанга алып барып койгула деп айткан. Мындан улам, Өзбекстандын Кыргызстандагы элчилиги менен сүйлөшүүлөрдүн негизинде, Азимжан Аскаровдун сөөгү Өзбекстанга жөнөтүлөт.

Эске сала кетсек, Азимжан Аскаров Жалал-Абад облусунун Базар-Коргон районунда жашаган жана адам укуктары менен алектенген. 2010-жылдагы июнь окуясынан кийин ал башаламандыкты уюштурган жана милиция кызматкеринин өлүмүнө катышкан деген шек менен кармалган. Бардык инстанциялардагы соттордун чечими боюнча ал 2010-жылдын июнь окуяларында башаламандык уюштурган деген айып менен өмүр бою эркинен ажыратылган.

2016-жылы апрелде БУУнун Адам укуктары боюнча комитети кыргыз бийлигин укук коргоочунун ишин кароого чакырган. Кийинчерээк бул иш Чүй облустук соту тарабынан каралып, 2017-жылдын 24-январындагы чечим менен өмүр бою абак жазасына кесилген.

2020-жылы 13-майда Кыргызстандын Жогорку Сотунда адвокаттардын кассациялык даттануусу боюнча укук коргоочу Азимжан Аскаровдун иши боюнча соттук отурум болуп өттү.

Кеңешме бөлмөсүнөн кайтып келген Жогорку Соттун сот коллегиясы төмөнкү инстанциялардын өкүмүн күчүндө калтырган.

Булак: NazarNews.kg